निजी सवारी साधन बिक्रीमे बृद्धि
पहुरा समाचारदाता
धनगढी, २२ कार्तिक । कोरोना महामारीसे मुलुकमे सार्वजनिक यातायात बन्द हुइलपाछे निजी सवारी साधन गैल वर्षके तुलनामे दोब्बर खरिद विक्री वृद्धि हुइल बा ।
हिरो मोटरसाइकल कम्पनीके धनगढीके अधिकारिक विक्रेता विशेष अटोमोवाईलस्के प्रबन्ध निर्देशक पुष्कर ओझा बन्दाबन्दी अवधिमे सरकारसे सार्वजनिक यातायात संचालनमे रोक लगाइलपाछे दुई पाङ्ग्रे स्कुटी, मोटरसाइल लगायत गाडी सोचसेफे दोब्बर बिक्री हुइल बटैलै ।
उहाँ बन्दाबन्दी हुइल शुरुके २ महिनासम पसल पूर्णरुपसे बन्द करल बटैटी जेष्ठसे विक्री कैना सुरु करल जानकारी डेलै ।
पछिल्का अवस्थामे यात्रुहुक्रे सार्वजनिक यातायातमे यात्रा कैना जोखिम मानल कारणसेफे निजी सवारी साधान ढेर विक्री हुई सेक्ना अनुमान करल उहाँ बटैलै ।
प्रबन्ध निर्देशक ओझा कहलै, ‘डस्या डेवारीके लाग नानल मोटरसाइकल डस्यासे आघे विक्री हुइल, अब्बे ग्राहकके माग अन्सार गाडी पुगैना धौ–धौ हुइटी बा ।’ पछिल्का अवस्थामे सीमानाका सिल हुइलपाछे और व्यवसायी जस्टे किराना पसल, औषधि पसलमे मजा व्यापार हुइटी रहल ओझा बटैलै ।
यातायात व्यवस्था कार्यालय धनगढीके अनुसार यी आर्थिक वर्ष सुरुवाटसंगै असारसे यहोर ४ हजार २ सय ४० ठो लौवा गाडी दर्ता हुइल बा ।
