कोरोनाके कारण स्थगित कक्षा ११ के अन्तिम परीक्षा सञ्चालन

पहुरा समचारदाता
अत्तरिया, २३ कार्तिक । कोरोना महामारीके कारण स्थगित हुइल कक्षा ११ के वार्षिक परीक्षा सञ्चालन हुई लागल बा ।

गोदावरी नगरपालिका अत्तरिया अन्तर्गतके निजी विद्यालयहुक्रे स्वास्थ्य सुरक्षा मापदण्ड पालना करके परीक्षा सञ्चालन करल हुइट ।

एभरेष्ट एकेडेमीके प्रिन्सिपल स्माइल चौधरी स्वास्थ्य सुरक्षा मापदण्ड पालना करके परीक्षा सञ्चालन करल जनैलै ।

परीक्षामे सहभागी विद्यार्थीनके लाग मास्क, सेनिटाइजरके साथे फेससिलके व्यवस्था समेत करल उहाँ जनैलै । ओस्टेक अत्तरियाके होलिल्याण्ड मावि, लोटस आइ स्कुल तथा जेके मावि फे परीक्षा संचालन करले बा ।

गेटा स्वास्थ्य चौकीके इन्चार्ज भक्तबहादुर विक विद्यार्थीहुकनके तापक्रम मापन तथा हात स्यानिटाइ करके वा हात धोके केल परीक्षा हलभित्र प्रवेश कैना करके हेल्थ डेस्कके व्यवस्था करल बटैलै । साथे गोदावरी नगरपालिकाके शिक्षा शाखा प्रमुख बसन्तकुमार खत्री सक्कु परीक्षा केन्द्रके अनुगमन करल बाटै । गोदावरी प्याब्सनके अध्यक्ष मानबहादुर चन्द करीब दुई सय पचास विद्यार्थी सहभागी हुइटी रहल जानकारी डेलै ।