हतियारसहित एसएसबी प्रवेश
पहुरा समाचारदाता
धनगढी, २४ कार्तिक । कञ्चनपुरमे हतियार सहित भारतीय एसएसबी नेपाली भूमीमे प्रवेश करल कहटी स्थानीय विरोध करले बाटै ।
सीमा स्तम्भके निरीक्षण कैना कहटी हतियार सहित एसएसबी नेपाली भूमीमे प्रवेश करलपाछे स्थानीय विरोध करटी उहाँहुक्रनहे भयवित हुइना मेरके आबसे नेपाली भूमीमे प्रवेश नाइ कैना आग्रह समेत करले बाटै ।
अन्तराष्ट्रिय सीमा निगरानी समूहके सदस्य हरिश पन्त बर्सौसे सीमा विवाद रहल उक्त क्षेत्रमे भारतीय एसएसबी हतियार सहित प्रवेश कैके एकतर्फी रुपमे नापजाँच करटी रहल बटैलै ।
बेलौरी नगरपालिका वडा १० के नेपाल भारत सीमा स्तम्भ ३१, ३२ ओ ३३ हुइल क्षेत्रमे हतियार सहित आइल एसएसबी एकतर्फी रुपमे भूमि नापल पाइलपाछे उहाँहुक्रनहे सम्झाबुझाइल बटैलै ।
नेपाल प्रहरी ओ सशस्त्र प्रहरीहे समेत बोलाके स्थानीय एसएबसीहे सम्झाके उप्रान्त जथाभावी नेपाली भूमीमे प्रवेश नाइ कैना आग्रह करल पन्त बटैलै । यहोर कञ्चनपुरके प्रमुख जिल्ला अधिकारी रामकुमार महतो सीमा स्तम्भके नियमित निरीक्षणके क्रममे एसएसबी सीमा क्षेत्रमे आइल रलेसे फेन पूर्व जानकारी नाइ होके स्थानीय विरोध करल बटैलै ।
उहाँ डुनु देशके ओरसे सीमा स्तम्भके बेलाबेला स्थलगत निरीक्षण कैना काम संयुक्त ओ एकतर्फी रुपमे हुइटी आइलमे जनैटी अस्वभाविक बात नाइ रहल बटैलै । मने आबसे पूर्व जानकारी कराके किल निरीक्षणमे अइना एसएसबीहे आग्रह करल प्रजिअ महतो बटैलै ।
