सुदूरपश्चिममे १२९ संक्रमिट ठप्लै
पहुरा समाचारदाता
धनगढी, २४ कार्तिक । सुदूरपश्चिम प्रदेशमे पछिल्का २४ घण्टामे १ सय २९ जाने कोरोना भाइरसके संक्रमित ठपल बाटै ।
सामाजिक विकास मन्त्रालयसे डेहल जानकारी टमान प्रयोगशालामे करल परिक्षणसे १ सय २९ जाने लौवा संक्रमिट ठपल हुइट । सेती प्रादेशिक अस्पतालके प्रयोगशालामे ६३, डडेल्धुरा अस्पतालके प्रयोगशालामे ३७, कमलबजारके प्रयोगशालामे ६, बझाङ अस्पतालके प्रयोगशालामे ९ ओ डोटी अस्पतालके प्रयोगशालामे १४ करके करके १२९ जाने संक्रमित ठपल बाटै । जेम्ने कैलालीके ४७, कञ्चनपुरके १५, अछामके ८, बैतडीके ९, बझाङके १०, बाजुराके ८, डडेल्धुराके १४, दार्चुला ओ डोटीके ९ जाने रहल बाटै ।
अभिनसम एक लाख १० हजार ९ सय ४४ जानेक स्वाव नमूना संकलन करलमे १ लाख १० हजार ५ सय ३३ स्वावके नमूना जाँच करेबेर एक लाख ३ सय ३७ नेगेटिभ ओ १० हजार १ सय ५४ पोजेटिभ आइल रहे । ४ सय ११ नमूनाके नतिजा भर अभिन अइना बाँकी बा, जेम्नेसे ८ हजार ४ सय ८५ ठिक हुके घर लौटल बाटै । सुदूरपश्चिम प्रदेशमे १६ सय ४२ सक्रिय संक्रमित रहल बाटै । कोभिड–१९ संक्रमणके कारण २७ जानेक ज्यान जासेकल मन्त्रालय जनैले बा ।
ओस्टेक सोम्मारके रोज देशभर पछिल्का २४ घण्टामे २५७१ जनहनमे कोरोना भाइरसके संक्रमण पुष्टि हुइल बा । देशभरके प्रयोगशालामे ११ हजार १७७ नमुना परीक्षण करेबेर १०५१ महिला ओ १५२० पुरुषमे संक्रमण पुष्टि हुइल हो ।
यी संगे कुल संक्रमितके संख्या १ लाख ९७ हजार २४ पुगल बा । ओइने मन्से ११२६ जानेक मृत्यु हुइल स्वास्थ्य तथा जनसंख्या मन्त्रालय जनैलै बा ।
१ लाख ५९ हजार ७२४ जाने संक्रमणमुक्त हुइल बाटै । पछिल्का २४ घण्टामे केल १७९८ जाने संक्रमणमुक्त हुइल हुइट । देशभर ३६ हजार १७४ सक्रिय संक्रमित बाटै । ओइने मन्से २९ हजार ८३६ जाने होम आइसोलेसनके बाटै । संस्थागत आइसोलेसनमे रहल मध्ये ४११ जानेक आईसीयू ओ ८३ जानेक भेन्टिलेटरमे उपचार हुइटी रहल बा ।
