कोरोना प्रतिरक्षाके लाग जेष्ठ नागरिकहे कम्मल वितरण
पहुरा समाचारदाता
धनगढी,२६ कार्तिक । कैलालीके धनगढी उपमहानगरपालिका–१५ के कार्यालयसे कोरोना प्रतिरक्षामे सहयोग पुगे कना उद्देश्यके साथ जेष्ठ नागरिकहुकनहे बुधके रोजसे कम्मल वितरण कैना सुरु करले बा ।
प्रतिनिधि सभा सदस्य माननीय नारादमुनी राना १०४ बरषके जेष्ठ नागरिक रम्भा रानाहे कम्मल ओह्राके कार्यक्रमके उदघाटन करले रहिट । कार्यक्रममे बोल्टी उहाँ न्यानो कपरा कम्मल जेष्ठ नागरिकहुकन जाडसे बचैनामे सहयोग मिल्न बटैलै ।
वडा कार्यालयके आर्थिक बर्ष २०७७/०७८ के बार्षिक कार्यक्रम अन्र्तगत विनियोजित बजेटसे ६० बरस उप्परके एकल महिला ओ ७० बरष उप्परके जेष्ठ नागरिकहुकनहे न्यानो कपडा कम्मल वितरण सुरु करल वडा अध्यक्ष फूलराम चौधरी बटैलै ।
‘अब्बेक विषम परिस्थितिमे कोरोना भाइरसके कारण जेष्ठ नागरिकहुकन ढेर असर परल बा’, वडा अध्यक्ष कहलै, –‘मौसम परिवर्तनसंगे बदलल जुरारसे बाँचेक लाग ६० बरस उप्परके एकल महिला ओ ७० बरष उप्परके जेष्ठ नागरिकहुकनहे न्यानो कपडा कम्मल वितरण सुरु कैगिल बा, जारसे लग्ना सरडीखोखी, निमोनिया लगायतके जोखिमसे बँचैटी कोरोना प्रतिरक्षाके काम करी ।’
वडाध्यक्ष कहलै, ‘ वार्षिक कार्यक्रम अन्र्तगत यी बरस ३ सय जनहनहे न्यानो कपडा कम्मल वितरण करटी, पहिल चरणमे बुधके रोज १८५ जनहनहे कम्मल ओ मास्क वितरण कैनाके साथे मास्क लगैना तरिका फे सिखागैल बा ।’
गैल बरस बार्षिक कार्यक्रकमे लाग एक लाख रुप्या केल बजेट विनियोजन कैगिल रहे, एकल महिला ओ जेष्ठ नागरिकहुकनहे न्यायो कपरा वितरण चाहल जटरा डेहे नइसेक्गिल, असौ बजेट ३ लाख विनियोजन हुइल ओरसे प्रभावकारी रुपमे वितरण करटी अध्यक्ष कहलै ।
जाड मौसम सुरु हुइलसंगे सेती प्रादेशिक अस्पतालमे कोरोना भाइरस संक्रमित हुके उपचार कैटी रहल टमान जेष्ठ नागरिकहुकनके निमोनिया, सरडीखोकीके कारण ज्यान जैटी रहल बा । वडा कार्यालयसे वितरण करल गरम कपरा जाडसे बचैनामे सहयोग पुग्ना आश लेगिल बा ।
न्यायो कपरा कम्पल वितरण कार्यक्रममे वडा सचिव मेखराज भट्ट, बेहडाबाबा जेष्ठ नागरिक समाजके अध्यक्ष गंगाराम राना, बुद्धिजिवी, राजनीतिक दलके प्रतिनिधिहुकनके सहभागिता रहल रहे । ३ सय जनहनहे वितरण कैना योजना रहल ओरसे वडा कार्यालय न्यानो कपडा कम्मल कार्य जारी रख्ना जनैले बा ।
