नगरप्रमुख वड ओ उपप्रमुख भट्टसे डेवारीके शुभकामना व्यक्त
पहुरा समाचारदाता
धनगढी, २८ कार्तिक । धनगढी उपमहानगरपालिका नगरप्रमुख नृपबहादुर वड ओ उपप्रमुख सुशीला मिश्र भट्ट डेवारी २०७७ के अवसरमे नगरवासीमे कामना व्यक्त करले बाटै ।
प्रमुख ओ उपप्रमुखसे जारी करल शुभकामना सन्देशमे कहल बा ‘‘हिन्दुहुकनके दुसरा भारी चाड शुभ–दीपावली २०७७ के पावन अवसरमे स्वदेश तथा विदेशमे रहल सक्कु नगरवासी डाडुभैया डिडीबहिनीहुकनके सुख, शान्ति, समृद्धि ओ उत्तरोत्तर प्रगतिके लाग हार्दिक शुभकामना व्यक्त करटी ।’
‘घरघरमे डेवारी करके हर्षोल्लासके साथ लक्ष्मीपूजा,भाई टिका लगाके मनैना यी चाड सक्कु नेपालीहुकनके मुहारमे उज्यालोपन नाने सेके, आपसी मेलमिलाप, भातृत्व, सामाजिक सद्भाव ओ सहिष्णुता आउर सुदृढ बने ओ समाजमे शान्ति एवं स्थायित्व कायम करके देशमे आर्थिक समृद्धिके डुवार खोलके समुन्नत नेपाल निर्माणके अभियानमे आघे बह्रना शुभ डेवारीके सक्कुहनहे प्रेरणा प्रदान करे कना शुभकामना व्यक्त करटी ।’ शुभकामना सन्देशमे उल्लेख बा ।
‘धनगढी उपमहानगरपालिकासे हरेक जाति, बर्ग, क्षेत्र, धर्म ओ समुदायके चाडपर्वहे समान प्राथमिकता डेटी आइल अवगत कराई चाहटी ।’ शुभकामना सन्देशमे कहल बा, ‘अब्बे कोरोना महामारीके जोखिम हुइल ओरसे आवश्यक काम बाहेक घर बाहेर नइनिक्रना, बजारमे किनमेल करेबेर, अनिवार्य रुपमे सामाजिक एवम् भौतिक दुरी कायम कैना, देउसी भैलो खेल्न कार्यक्रमके आयोजना नइकैना, जोखिम घटाइक लाग मास्कके प्रयोग कैना, बारबार साबुन पानीसे हात धुइना, सरसफाईमे ध्यान डेना ओ जुरी अइना, थकाई लग्ना, सुख्खा खोकी लग्टी रहलेसे स्वास्थ्यकर्मीके परामर्श लेना सक्कुहुनमे हार्दिक आह्वान करटी ।’
डेवारीमे भीडभाड नइकैना धनगढी उपमहानगरपालिकाके अनुरोध
कोरोना संक्रमणके दर बह्रटी गैल ओरसे डेवारीमे समेत भीडभाड नइकैना धनगढी उपमहानगरपालिका अनुरोध करले बा ।
धनगढी उपमहानगरपालिका कोरोना संक्रमितहुकनके संख्या बह्रटीप्रति चिन्ता व्यक्त करटी चाडपर्वके समयमे हुइना ढेर आवातजावातसे संक्रमण फैल्ना हुइल ओरसे घरभिटरे सुरक्षित हुके पर्व मनैना आग्रह करले बा । बिफेक रोज बैठल नगर कार्यपालिका बैठकसे नगरवासीमे डेवारीमे आयोजना हुइना ढेउँसी–भैलीके कार्यक्रम आयोजना नइकैना अनुरोध कैना निर्णय हुइल नगरप्रमुख नृपबहादुर वड बटैलै ।
