‘सरकार जनताप्रति जवाफदेहिता नइहो’

पहुरा समाचारदाता
धनगढी,२८ कार्तिक । विद्यामान परिस्थितिमे सरकार जनताप्रति जवाफदेहिता बने नइसेकल एक कार्यक्रमके सहभागीहुक्रे बटैले बाटै ।

अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीके आयोजनामे हुइल जिल्ला मानव अधिकार रक्षक संजालके अवस्था तथा सवाल विषयक फलोअप बैठकके सहभागीहुक्रे कोरोना भाइरसके कारण सक्कु क्षेत्र अक्रान्त बन्टी गैलबेला राज्य जवाफदेही बने नाइसेकल बटैले रहिट ।

बैठकमे सहजीकरण करटी इन्सेक प्रदेश संयोजक खडकराज जोशी सुदूरपश्चिम प्रदेशमे कोरोना संक्रमितके संख्या बह्रटी गैल मने उपचार फितलो हुइल बटैलै । उहाँ कहलै, सुदूरपश्चिम प्रदेशमे आइसियु ओ भेन्टिलेटर अभाव बा, कोरोना संक्रमितके संख्या दिनहुँ बह्रटी गैलपाछे प्रदेशमे आइसियु ओ भेन्टिलेटर अभावसे उपचार पाइ नाइ सेक्ना अवस्था डेखगैल बा ।’

गम्भीर प्रकृतिके लक्षणसहित संक्रमित बह्रलपाछे अब्बे सुदूरपश्चिममे रहल सीमित आइसियु, भेन्टिलेटर ओ आइसोलेसन बेड भरिभराउ रहल उहाँ कहलै । आइसियु ओ भेन्टिलेटर नाइ पाके कैयौं संक्रमित समस्यामे परल प्रदेश संयोजक जोशी कहलै । कोभिडके कारण स्वास्थ्यसंगे शैक्षिक क्षेत्र, कृषि क्षेत्रमे समेट समस्या बह्रल मने सरकारके ध्यान पुगे नइसेकल उहाँक कहलै ।

राष्ट्रिय मानव अधिकार आयोग सुदूरपश्चिम प्रदेश प्रमुख झंकर रावल कोभिड–१९ सक्कु क्षेत्रमे असर परल ओरसे राज्य पक्षसे जनताके आवश्यकता अनुसार आघे बह्रे पर्ना जरुरी रहल बटैलै । मानव अधिकार रक्षक संजालके सदस्यहुक्रे लकबन्दीके बेला जोखिम मोलके काम करटी रहल उहाँ बटैलै ।

ओरेक नेपाल कैलालीके कार्यक्रम संयोजक गीता चौधरी लकबन्दीके बेला महिला हिंसा, बालविवाह, जवरजस्ती करणीके घटना बह्रल बटैली । उ बेला ढेर महिला तथा बालबालिका पीडित हुइल उहाँ जनैली ।

माइती नेपालके गंगा चौधरी लकडाउनके अवधिमेफे कोई मानव बेचविखनमे नपरिट कटी प्रहरीके समन्वयमे गतिविधि जारी राखल बटैली । उहाँ, कहली लकडाउनपाछे दुई महिलाहुकनके भारतसे उद्धार करल कैगिल बा ।’

जिल्ला मानव अधिकार रक्षक संजालके संयोजक वेद अवस्थी लकडाउनके अवधिमे विद्यालय बन्द हुके विद्यार्थी पह्रे पैनासे बन्चित हुइल मने विद्यालय भर टमान बहनामे शुल्क लेहल बटैली । सिविन नेपालके हरिलाल चौधरी लकडाउनके बेला अप्ध्यारोमे परल अनाथ बालबालिकाहुकनके अब्बे राहत वितरण करके सहयोग करटी रहल जनैलै ।

यिहे विच जिल्ला मानव अधिकार रक्षक संजाल कैलालीके सल्लाहकार समेत रहल राष्ट्रिय मानव अधिकार आयोग सुदूरपश्चिम प्रदेश प्रमुख झंकर रावलके नेपालगंज सरुवा हुइल ओरसे उहाँहे सम्मानसहित विदाई कैगिल बा । उहाँहे इन्सेक प्रदेश संयोजक खडकराज जोशी मायाके चिनो सहित खादा ओह्राके विदाई करटी अगामी दिनके सफलताके कामना करले रहिट ।