छोरुवा गैयागोरुनसे दुर्घटना बर्हल
पहुरा समाचारदाता
धनगढी, ५ अगहन । पाछेक समय सडक दुर्घटनाके प्रमुख कारक छोरुवा गैयागोरु बने लागल बाटै । रातके समयमे सडकमे गोठल छोरुवा गैयागोरुनसे फेन दुर्घटना बर्हल जनाइल बा ।
सुदूरपश्चिम प्रदेश ट्राफिक कार्यालय अत्तरियाके प्रमुख एसपी बामदेव गौतम छोरुवा गैयागोरुनसे दुर्घटना बर्हटी रहल बटैलै । छोरुवा गैयागोरुनसे खास कैके अत्तरिया क्षेत्र दुर्घटनाके उच्च जोखिममे डेखगैल बा ।
‘पाछेक समय दुर्घटनाके प्रमुख कारक छोरुवा गैयागोरु हुइट,’ उहाँ कहलै । प्रदेश ट्राफिक प्रमुख होके आइल लगत्ते मै राजमार्ग व्यवस्थापन तथा सवारी दुर्घटना न्यूनीकरण समिति नै बनाके सुरक्षा टोली परिचालन करले बाटुँ, एसपी गौतम कहलै ।
छोरुवा गैयागोरुनसे ट्राफिक जामके प्रमुख चुनौतीके रुपमे फेन डेखगैैल उहाँ बटैलै । ‘बजारमे छोरुवा गैयागोरुनके कारण प्रहरीहे सवारी साधन व्यवस्थित कैना कि चौपाया भगैना कना समस्या पर्ना करल बा,’ उहाँ कहलै, ‘मुख्य सडक तथा बजार क्षेत्रमे छाडा चौपायामुक्त करक लाग स्थानीय तह सहयोग कैना जरुरी बा ।’
उहाँ स्थानीय तहसे छोरुवा गैयागोरु व्यवस्थापन कैडेलेसे दुर्घटना कम हुइना ओ ट्राफिक जामके समस्या हट्ना बटैलै । पाछेक दिनमे पूर्वपश्चिम राजमार्ग क्षेत्रमे सबसे ढिउर छोरुवा गैयागोरुन रहल ओरसे फेन दुर्घटना बर्हटी गैल बटैलै । आघेक बरस छोरुवा गैयागोरुनके कारण १० ठो दुर्घटना हुइल रहे । मने छोरुवा गैयागोरुनके विगविगीके कारण पाछेक समय सडक दुर्घटना बर्हटी गैल बा ।
छोरुवा गैयागोरुनके सबसे ढिउर अत्तरिया, लालपुर, चौमाला, मसुरिया, पहलमानपुर, सुखड, बौनिया तथा लम्कीमे दुर्घटना हुइना करल बावै ।
