सुदूरपश्चिममे १७२२ सक्रिय संक्रमित
पहुरा समाचारदाता
धनगढी, ५ अगहन । सुदूरपश्चिम प्रदेशमे १७ सय २२ जाने कोरोना भाइरसके सक्रिय संक्रमित रहल बाटै ।
सुदूरपश्चिम प्रदेश सामाजिक विकास मन्त्रालय प्रशासन तथा योजना अनुगमन महाशाखासे डेहल जानकारी अन्सार विफेसम नौ जिल्लामे १७ सय २२ कोभिड–१९ के सक्रिय संक्रमित रहल बाटै ।
सबसे ढेर कैलालीमे ७५२, बझाङमे २२३, दार्चुलामे २१३, डडेल्धुरामे ११६, डोटीमे १४५, कञ्चनपुरमे ११०, बाजुरामे १९, बैतडीमे ४८, अछामे ७२ ओ अन्यमे २४ करके १७ सय २२ जाने रहल महाशाखा जनैले बा ।
विफेसम १ लाख १५ हजार १ सय ५७ जानेक नमूना संकलन करलमे १ लाख १४ हजार १ सय ४७ स्वावके नमूना जाँच करलमे १ लाख ३ हजार ५ सय ६७ नमूना निगेटिभ ओ १० हजार ६ सय ४ नमूना पोजेटिभ आइल बा । कलेसे ९ सय ८६ स्वावके नमूना अइना बाँकी रहल जनागिल बा ।
महाशाखाके अन्सार पोजेटिभ डेखल मन्से ८ हजार ८ सय ४९ जाने ठिक हुके घर लौटल बाटै । कलेसे अभिनसम यी प्रदेशमे ३३ जानेक ज्यान गैल बा ।
सुदूरपश्चिम प्रदेशके सेती प्रादेशिक अस्पतालमे ३७, टीकापुर अस्पतालमे १६, महाकाली अस्पतालमे ३, अछाम अस्पतालमे १०, डोटी अस्पतालमे २, डडेल्धुरा अस्पतालमे ३ ओ दार्चुला अस्पातालमे १ जानेक आइसोलेशन वार्डमे उपचार करैटी रहल बाटै ।
