नेकासे क्रियाशिल सदस्यता फाराम नविकरण कैना

पहुरा समाचारदाता
धनगढी, ७ अगहन । नेपाली काँग्रेस कैलालीसे १४ औँ महाधिवेसनके लाग क्रियाशिल सदस्यता फाराम नविकरण कैना कार्यतालिका तय करले बा ।

शनिच्चरके रोज धनगढीमे हुइल ३९ औँ बैठकमे क्रियाशिल सदस्यता फाराम नविकरण कैना कार्यतालिका तय करल प्रशिक्षण शाखाके सचिव नृपबहादुर सुनार जानकारी डेलै ।

कार्यतालिका अन्सार संघीय निर्वाचन क्षेत्रीय कार्यसमितिसे अइना अगहन ९ गतेभिटर नविकरण फारम प्रदेश समितिहे फाराम वितरण कैना जनागिल बा ।

प्रदेश समितिसे अगहन १२ गतेसम गाउँपालिका ओ नगरपालिकाहे हस्तान्तरण कैना, गाउँ नगर कार्यसमितिसे अगहन १५ गतेभिटर वार्ड कार्य समितिहे फाराम उपलब्ध करैही । वडा कार्य समितिलहे नविकरण फारम भराई २५ गते गाउँ ओ नगरकार्य समितीमे पठाई पर्ना ओ २९ गते भिटर प्रदेश समितिसे संघीय निर्वाचन क्षेत्रमे पठाई पर्ना काँग्रेस कैलालीके सभापति नरनारायण शाह बटैलै ।

क्रियाशिल सदस्यता नविकरण करलपाछे केल लौवा क्रियाशिल सदस्यता वितरण करजाई । १३ औँ अधिवेसनमे ११ हजार ३ सय २२ क्रियाशिल सदस्य रहिट । शनिच्चर धनगढीमे सम्पन्न बैठकमे नेपाली काँग्रेसके केन्द्रीय सदस्य रामजनम चौधरी, पुर्व केन्द्रीय सदस्य सुनिलकुमार भण्डारी, पुर्व मन्त्री जनक चौधरी जिल्लाके पदाधिकारी लगायतके नेता कार्यकर्ताहुकनके उपस्थिति रहल रहे ।