मालपोत कार्यालय टीकापुरके सेवा अनिश्चितकालके लाग बन्द

टीकापुर, ७ अगहन । मालपोत कार्यालय टीकापुर अँट्वारसे अनिश्चितकालके लाग सेवा बन्द करले बा । एकजाने कर्मचारीमे कोरोना डेखलपाछे कार्यालय दुसर सूचना जारी नइहुइटसमके लाग सेवा बन्द करल जनैले बा ।

कार्यालयसे सूचना जारी करटी कोरोना संक्रमण सेवाग्राही तथा सर्वसाधारणमे फैले नइडेना दुसर सूचना जारी नइहुइटसमके लाग सेवा बन्द करल उल्लेख करले बा । सार्वजनिक सूचनामे आन्तरिक÷प्रशासनिक कार्य भर खुल्ना रहना जनाइल बा ।

कार्यालयमे कार्यरत एक महिला कर्मचारीमे कोरोना संक्रमण पुष्टि हुइल स्रोत जानकारी डेले बा । ती महिलाके घरेक और सदस्यहे कोरोना डेखलपाछे स्वाव संकलन करल रहे ।

उ महिला कर्मचारीमे कोरोना डेखलपाछे कार्यालयमे कार्यरत सक्कु कर्मचारीके स्वाव संकलनके तयारी हुइटी रहल खरिदार प्रेम प्रकाश सिँह जानकारी डेलै । उहाँक अन्सार सोम्मार सकारे सक्कु कर्मचारीके स्वाव संकलन करजाई । कार्यालयमे हाल १५ जाने कर्मचारी कार्यरत बाटै ।

स्वाव संकलन पश्चात रिपोर्ट नइआइटसम कार्यालयके सेवा ठप्प रही । खरिदार सिँहके अन्सार कर्मचारीके कोरोना रिपोर्टके आधारमे सेवा सुचारु कैना नइकैना बारेमे निष्कर्षमे पुगजाई । मालपोत कार्यालयमे सेवाग्राहीके अत्याधिक घुईँचो हुइना करल बा ।

कुछ दिनआघे कार्यालय कोरोना रोकथामके लाग कहटी स्थानीय पालिका अन्सार सेवाग्राहीके काम आलोपालो प्रणाली अन्सार करल रहे ।