ओरेकसे युवा सूचना केन्द्रहे सहयोग

पहुरा समाचारदाता
धनगढी, ८ अगहन । ओरेक कैलालीसे बालिका पैरवी परियोजना मार्फत दुई युवा सूचना केन्द्रहे टमान सामग्री सहयोग करले बा ।

यूवाहुकन सूचना प्रवाह, प्रविधिमे पहुँच अभिवृद्धि कैनाके साथे सचेतना मुलक सन्देश प्रकाशनमे सहजता होए कहटी घोडाघोडी नगरस्तरीय युवा सञ्जाल ओ गौरीगंगा नगरस्तरीय प्रगतिशिल युवा सञ्जालके युवा सूचना केन्द्रहे टमान सामग्री सहयोग करल ओरेक कैलालीके कार्यक्रम संयोजक गीता चौधरी बटैली ।

दुनु केन्द्रहे १/१ सेट स्यामसुङ ३२ इन्ची स्मार्ट टिभी, कम्प्युटर सेट, एमडी २४४ के क्यानन प्रिन्टर, ५/५ ठो प्लाष्टिक कुर्सी ओ साईन बोर्ड करके २ लाख ४७ हजार ५ सय बराबरके सामान घोडाघोडी नगरपालिकाके प्रशासकीय अधिकृत खगेन्द्रबहादुर सिंह ओ गैरसरकारी संस्था महासंघके जिल्ला अध्यक्ष हेमकर्ण बिक मार्फत नगरस्तरीय युवा सञ्जालके अध्यक्षहुकनहे हस्तान्तरण करल बा ।

इलेक्ट्रोनिक्स लगायत सामग्री उपलब्ध हुइलपाछे केन्द्रहे नगरपालिकाभिटरके युवा हुकनहे टमान सूचना प्रवाह कैना, रोजगारीके लाग, अन्य स्वरोजगार सम्बन्धी तालिम डेना, यूवाहुकनके प्रविधिमे पहुँच अभिवृद्धि कैना, स्थानीय निकाय तथा अन्य निकायसे टमान अनुदान लगायत सचेतना मुलुक सन्देश प्रकाशन कैना सहजुल हुइना युवा सूचना केन्द्र गौरीगंगाके अध्यक्ष सयराम चौधरी बटैलै ।

अनलाइन पहुँच नइहुइल यूवा आबसे सूचना केन्द्रसे आके प्रविधि मार्फत सेवा लेहे सेक्ना घोडाघोडी नगरस्तरीय युवा सञ्जालके अध्यक्ष शंकर डंगौरा बटैलै । उहाँ कहलै, ‘जेकर घरेम नेटवर्क नइहो कलेसे सूचना केन्द्रसे बैठक तथा तालिममे सहभागीहुई पैना व्यवस्था हुइल बा ।’

सामग्री हस्तान्तरण कार्यक्रममे ओरेक कैलालीके जिल्ला संयोजक बिनु राना (जोशी) लगायतके सहभागिता रहे ।