सुदूरपश्चिम प्रदेशमे नमूना संकलन सुस्त
पहुरा समाचारदाता
धनगढी, १७ अगहन । सुदूरपश्चिम प्रदेशमे पाछेक दिनमे कोभिड–१९ के शंकास्पद व्यक्तिके नमूना संकलन कैनामे कमी आइल बा ।
गैल एक अँठ्वारमे प्रदेशके टमान जिल्लाके कोरोनाके शंकास्पद दुई हजार ३५१ जनहनके नमूना किल संकलन हुइ सेकल बा । लावा संकलित नमूनासमेत गैल अँठवारमे दुई हजार ३८८ नमूनाके परीक्षण हुइबर ३९२ जनहनमे संक्रमण पुष्टि हुइल बा ।
सामाजिक विकास मन्त्रालयके तथ्यांक विश्लेषण करेबर यी अवधिमे थप ३९२ जनहनमे संक्रमण डेखेबर ४१३ जनहनके उपचार व्यवस्थापनपाछे घर गैल बाटै । अब्बेसम नौ हजार ४६० घर जासेकल बाटै ।
संकलन हुइल कुछ नमूनाके परीक्षण हुइना बाँकी रहल बा । सेती प्रादेशिक अस्पताल धनगढी, कोभिड–१९ उपचार विभागके प्रमुख डा शेरबहादुर कमर कोरोना भाइरसके संक्रमण हुइना दरमे कमी नाइ आइल बटैलै । ‘जार मौसममे ‘भाइरल इम्फेक्सन’के जोखिम ढिउर हुइना हुइल ओरसे कोरोनाके जैसिन लक्षण डेखजैना निमोनिया, रुघाखोकीके बिरामी बर्हटी गैल डेखगैल बा’, उहाँ कहलै, ‘पाछेक दिनमे कोरोना भाइरसके जटिल अवस्थाके ओ सक्रिय संक्रमित बिरामी भर्ना हुइना दर फेन बर्हटी रहल बा ।’
स्वास्थ्य निर्देशनालय दीपायलके कोभिड–१९ सम्पर्क व्यक्ति हेमराज जोशी आवश्यक स्वास्थ्यकर्मीके अभाव होके नमूना संकलन कैनामे कमी आइल जानकारी डेलै । लक्षण डेखगैल ओ ओइसीन व्यक्तिके सम्पर्कमे आइल, अन्यत्र ठाउँसे आके क्वारेन्टिनमे बैठलहुक्रनके किल नमूना संकलन करे पर्ना पाछेक मापदण्ड बनल ओरसे फेन नमूना संकलनमे कमी आइल हुइ सेक्ना उहाँ बटैलै ।
संक्रमित होके होम आइसोलेसनमे मृत्यु हुउइया कतिपयके तथ्यांक भर मन्त्रालयसंग नाइ रहल हो । आजसम कैलालीमे १९, कञ्चनपुरमे पाँच, डडेल्धुरा ओ बझाङमे तीन÷तीन, अछाम, बाजुरा, दार्चुलामे दुई÷दुई ओ डोटी तथा बैतडीमे एक÷एक कैके जम्मा ३८ जनहनके मृत्यु हुइल बा ।
सेती प्रादेशिक अस्पतालमे कोरोना संक्रमणके जटिल अवस्थाके सात जनहनके सघन उपचार कक्षमे ओ दुई जनहनके भेन्टिलेटरमे उपचार व्यवस्थापन हुइटी रहल बा । तोकल स्वास्थ्य सुरक्षाके मापदण्ड नाइ अपनाके सर्वसाधाणके चहलपहल बर्हेबर कोरोना फैलना जोखिम थप बर्हल स्वास्थ्यकर्मीके कहाइ बा ।
