मोर्चाके विरोध सभा कार्यक्रम स्थागित

पहुरा समाचारदाता
धनगढी,१८ अगहन । थरुहट थारुवान राष्ट्रिय मोर्चा यिहे अगहन २० गतेसे टिकापुरमे आहवान करल विरोध सभा स्थागित हुइल बा ।

विरोध सभा तयारी समितिके संयोजक थारु कल्याणकारी सभा क्षेत्र नंं.१, क्षेत्रीय समितिके सभापति लौटन चौधरीहे कोरोना भाइरस संक्रमण डेखलपाछे मोर्चासे बुधके रोज प्रेस विज्ञप्ती जारी करटी दुसर सूचना नइआइटसमके लाग विरोधसभा स्थागित हुइल जनैले बा ।

माननीय रेशम चौधरी लगायत ११ जाने निर्दाेष राजबन्दीहुकनहे हाली रिहाइके लाग थारु कल्याणकारी सभा क्षेत्र नंं.१, क्षेत्रीय समिति ओ थरुहट थारुवान राष्ट्रिय मोर्चा कैलालीके संयुक्त आहवानमे विरोध सभा कैना कहटी विरोध सभा तयारी समितिके संयोजक थारु कल्याणकारी सभा क्षेत्र नंं.१, क्षेत्रीय समितिके सभापति लौटन चौधरीहे जिम्मा डेना निर्णय हुइल रहे ।
संयोजक लौटनहे एक हप्ता आघेसे सरदीखोखी ओ जुरी जैसिन लक्ष्ण विल्गाइलपाछे स्वास्थ्य जाँचके क्रममे यिहे १६ गते कोरोना भाइरस संक्रमण पुष्टि हुइल रहे ।

विश्वव्यापी स्वास्थ्य मापदण्डहे मध्यनजर करके विरोध सभा करेबेर भीडभाड हुके जनस्तरमे संक्रमणके सम्भावना आउर बह्रे सेक्ना ओरसे विरोध सभा स्थागित करल मोर्चा कैलालीके संयोजक माधव चौधरी बटैलै । उहाँ कहलै, ‘परिस्थितीहे मध्य नजरके करके दुसर सूचना नइआइटसमके लाग स्थगन करल बा ।’

सविधान निर्माण क्रममे थरुहट थारुवान अन्दोलन हुईबेर २०७२ भदौ ७ ओ ८ गते टिकापुर घटना हुइल रहे । उहे भदौ ७ गते आन्दोदलकारीहुकनसंगके दोहोरो झडपमे सुरक्षामे खटल सुरक्षाकर्मी कर्तव्य निर्वाह करटी करटी सहिद हुइल रहिट । उ सुरक्षाकर्मीहुकनके हत्या करल कहिके थरुहट थारुवान अन्दोलनकारीहुकनहे सुनियोजित रुपमे जेल दारगिल बा । उहोर भदौ ८ गते सम्प्रदायिक दंगा भरकना मेरिक थारु समुदायके घर, पसल, व्यापार, एफ.एम छानछान लुटपाट, आगजन कैना कठित अपराधिहुकनहे राज्यसे संरक्षणमे धारल विज्ञप्तीमे कहल बा । यी मेरिक सरकारी अराजकता ओ विभेदहे सदाके लाग हटैना ओ टिकापुर घटनाहे राजनितिक रुपमे समधान करेक लाग राज्यहे निरन्तर दवाब डेहक लाग विरोध सभाके आयोजना करल रहे ।