डुल्हा, डुल्हनिया सहित १३ जाने घाहिल, चार जानेक अवस्था गम्भीर

पहुरा समाचारदाता
धनगढी,१८ अगहन । कैलालीके गोदावरी नगरपालिका वडा नं.४ गाईमारास्थित भीमदत्त राजमार्ज सडक खण्डमे गैल रात सावा ११ बजे भोजहा जीप दुर्घटना हुके १३ जाने घाहिल हुइल बाटै ।
बैतडीसे डुल्हनिया लेके बेलौरी कञ्चनपुर अइटी रहल सु.प.प्र.०१००१ज.१२५४ न.के बिङगर सडकसे २०० मिटर तरे गिरलपाछे चालक सहित ओम्ने सवार १३ जाने घाहिल हुइल जिल्ला प्रहरी कार्यालय कैलालीके प्रहरी नायव उपरीक्षक प्रतिक विष्ट जनैले बाटै । घाहिल मन्से चार जानेक अवस्था गम्भीर रहल प्रहरी जनैले बा ।

दुर्घटनामे परके गम्भीर घाहिलमे कञ्चनपुर बेलौरी न.पा.३ बैठना निर्मल चौधरीके ७ बरसके छावा प्रदिप चौधरीके कपरीम चोट लागके अवस्था सिरियस रहल हुकान माया मेट्रो धनगढी अस्पतालमे आइसियूमे धारके उपचार हुइटी रहल बा ।

ओस्टेक अवस्था गम्भीर रहल बेलौरी न.पा.३ बैठना वर्ष २५ के राधा चौधरी, कञ्चनपुर पुनर्वास न.पा.३ बैठना वर्ष २१ के राजु पार्कीके कपारमे चोट लागके पदमा अस्पताल अत्तरियामे उपचार हुइटी रहल बा । कञ्चनपुर पुनर्वास न.पा.२ बैठना वर्ष ३० के बिर बहादुर सार्कीके कपार ओ छातीमे चोट लागके अवस्था गम्भिर रहल हुकान माया मेट्रो अस्पताल धनगढीमे उपचार हुइटी रहल बा । विरबहादुर चालक गाडीके डइबरुवा हुइट ।

ओस्टेक डुल्हा कञ्चनपुर बेलौरी न.पा.३ बैठना वर्ष २१ के गोबिन्द लुहार ओ डुल्हनिया बैतडी दोगडा केदार न.पा.६ बैठना वर्ष २० के डम्मरा लुहारहे चोट लागके घाहिल हुइल बाटै । और घाहिलमे कञ्चनपुर बेलौरी न.पा.३ बैठना वर्ष १४ के बिशाल चौधरी, वर्ष २१ के हरिष लुहार, वर्ष २७ के निर्मल चौधरी, बैतडी दोगडा केदार न.पा.८ बैठना वर्ष १५ के शेर लावड, बैतडी दोगडा केदार न.पा.६ बैठना वर्ष २० के अर्जुन लुहार, वर्ष ५० के लक्षी लुहार ओ कञ्चनपुर कृष्णपुर न.पा.३ बैठना वर्ष २६ के गोरे लुहार रहल बाटै । कपार, हाठ, गोरमे चोट लागल ओइनके पदमा अस्पताल अत्तरिया ओ माया मेट्रो धनगढी अस्पतालमे उपचार हुइटी रहल प्रहरी प्रवक्ता विष्ट बटैलै ।