कर्मचारी अभावसे लक्षित कार्यक्रम प्रभावित

पहुरा समाचारदाता
धनगढी, १८ अगहन । खाद्य प्रविधि तथा गुण नियन्त्रण कार्यालय धनगढी कार्यालयमे आवश्यक कर्मचारी नाइ होके प्रथम चौमासिकमे कार्यालयसे लक्षित ढिउर कार्यक्रम सम्पन्न करे नइसेकल जनैले बा ।
कार्यालयके दरबन्दी अनुसार ढिउर दरबन्दी रिक्त रहल ओरसे कार्यलयके लक्षित कार्यक्रम प्रभावित होके सम्पन्न हुइ नाइ सेकल जनाइल बा । बुधके रोज कार्यालयके आर्थिक बरस २०७७÷०७८ के प्रथम चौमासिक पग्रति विवरण प्रस्तुत करटी वरिष्ठ खाद्य अनुसन्धान अधिकृत तथा कार्यालय प्रमुख नवराज दाहाल कार्यालयमे आवश्यक कर्मचारी नाइ होके कार्यलयके लक्षित कार्यक्रम सम्पन्न हुइ नाइ सेकल बटैलै ।
कार्यालयमे कुल १५ दरबन्दी रहलमे अब्बे एक जाने किल स्थायी कर्मचारी कार्यरत रहल ओ चौमासिक अन्तमे एकजाने स्थायी प्रासके पदस्थापन होके हाल २ जाने किल कार्यरत रहल जनाइल बा । अन्य २ जाने प्राविधिक करारमे रहल ओ रिक्तदरबन्दी ९ रहल ओरसे लक्षित कार्यक्रम समयमे सम्पन्न नाइ करल प्रमुख दाहाल बटैलै ।
कार्यलयसे प्रथम चौमासिकमे २३ लाख ९२ हजार रुप्या खर्च करले बा । वार्षिक स्वीकृत बजेट १३ करोड ६४ लाख ३ हजारमे प्रथम चौमासिक बजेट ५२ लाख ६३ हजारमेसे ओत्र रकम खर्च करल जनाइल बा ।
कार्यलयके खाद्य नमुना विश्लेषणमे बार्षिक लक्ष्य १ हजार ७५ रहल ओ प्रथम चौमासिकके लक्ष्य ३ सय ५८ रहलमे प्रथम चौमासिकमे ६ सय ४८ प्रगति करले बा । दाना नमूना विश्लेषणमे बार्षिक ९० रहल ओ प्रथम चौमासिकके ३० रहलमे १३ प्रगति, खाद्य अनुज्ञापत्र, सिफारिस जारी तथा नविकरण बार्षिक ६ सय रहल ओ प्रथम चौमाासिकके २ सय लक्ष्य रहलमे १४१ प्रगति रहल जनाइल बा । ओस्टके कार्यालयसे प्रथम चौमासिकमे खाद्य बजार अनुगमनमे कार्यालयसे प्रथम चौमासिकमे १५ चो, दाना बजार अनुगगमन २ ओ होटल रेस्टुरेन्ट अनुगमन ६ चो किल करल जनैले बा । कोभिडके कारण विशेष कैके होटल, रेस्टुरेन्ट बन्द रहल ओ गोष्ठी भेला कैना असहज हुइल ओरसे अनुगमन, होटल स्तरीकरण ओ सडक छेउछाउ विक्री हुइना खाद्य स्वच्छता अभिवृद्धि कार्यक्रम सञ्चालनमे प्रभावित हुइल प्रमुख दाहाल जानकारी डेलै ।
धनगढी उप–महानगरपालिकाके नगरप्रमुख नृप बहादुर वड खाद्य सुरक्षाके लाग समय समयमे बजार अनुगमन कैनामे जोड डेहल रहिट । उहाँ मासिक रुपमे एकचो हुइलेसे फेन स्थाीनय सरकार, खाद्य प्रविधि तथा गुण नियन्त्रण कार्यालयके कर्मचारी, प्रहरी प्रशासन, सञ्चारकर्मी सहितके संयुक्त अनुगमन टोलीसे अनिवार्य बजार अनुगमन करे पर्ना जोड डेलै । कार्यक्रममे उपप्रमुख सुशिला मिश्र भट्ट, उपभोक्ता हित संरक्षण मञ्चके भोजराज जोशी, कर्मचारी, सञ्चारकर्मीनके सहभागिता रहे ।