सुदूरपश्चिमसे औद्योगिक विकासके युग सुरु: उद्योगमन्त्री भट्ट
पहुरा समाचारदाता
धनगढी, ९ फागुन । उद्योग वाणिज्य तथा आपूर्ति मन्त्री लेखराज भट्ट सुदूरपश्चिम प्रदेशसे औद्योगिक विकासके युग सुरु हुइल बटैले बाटै ।
अँट्वारके सकारे प्रेस संगठन नेपालसे अत्तरियामे आयोजना करल पत्रकार सम्मेलनमे बोल्टी मन्त्री भट्ट औद्योगिक प्रदेशमे धमाधम औद्योगिक क्षेत्र सञ्चालनमे अइना बटाइल हुइट ।
’प्रधानमन्त्री केपी शर्मा ओली सोम्मारके कञ्चनपुरके दैजी छेला औद्योगिक क्षेत्रके उद्घाटन करटी आइटै,’मन्त्री भट्ट कहलै,’ सुखी नेपाली समृद्ध नेपालके नाराहे कार्यान्वयन कैना देशभर औद्योगिक क्षेत्रके शिलान्यास कैना कार्यक्रम तय हुइल बा ।’
९ अर्बके लागतमे ५ बरस भित्रे निर्माण सम्पन्न हुइना मेरके दैजी छेला औद्योगिक क्षेत्रके निर्माण हुइ लागल भट्ट बटैलै । ’कैलालीके हरैयामे साढे ३ सय बिगाहा क्षेत्रफलमे सेज निर्माण, डुढेझारीमे औद्योगिक क्षेत्र, कञ्चनपुरमे सुख्खा बन्दरगाह के अध्ययन प्रतिवेदनके काम आघे बह्रसेकल बा ,’मन्त्री भट्ट कहलै,’विशेष कैके इ क्षेत्रके खानीके पहिचान कैके उत्खनन अन्वेषण कैना कार्य सुरु हुइल बा । बैतडीमे रहल फलाम खानीके फेन इ बरस भित्रे काम आघे बह्रना बा ।’
निर्माणाधीन गेटा मेडिकल कलेजहे सुदूरपश्चिमके मेडिकल विश्वविद्यालयके रूपमे विकास करे लागल मन्त्री भट्ट बटैलै । ‘गेटा मेडिकलके भौतिक पूर्वाधार निर्माणके कार्य ओरैटी बा, प्रधानमन्त्री ओ शिक्षामन्त्रीसे बातचित हुइल बा’, उहाँ कहलै,’आब उ मेडिकलमे रहल समितिसे फेन अध्ययन करजैटी बा । इहीसे सुदूरपश्चिमके किल नैहोके देशके मेडिकल क्षेत्रमे योगदान पुगैना रहल ओरसे विश्व विद्यालयके रूपमे विकास करब ।’
‘साथे मन्त्री भट्ट तोकल समयमे निर्वाचन हुइना दाबी करले बाटै । निर्धारित मितिमे निर्वाचन हुइ’, उहाँ कहलै,’चुनावके लाग निर्वाचन आयोग गृह कार्यमे लागसेकल बा ।’
