अत्यधिक गर्मीसे धनगढीके विद्यालयमे चार दिन विदा
पहुरा समाचारदाता
धनगढी, ८ असार । अत्यधिक गर्मी बह्रटी गैलपाछे धनगढी उपमहानगरपालिकासे अपन क्षेत्रभिटरके सामुदायिक तथा संस्थागत विद्यालयमे चार दिन बिदा डेना निर्णय करले बा । उपमहानगरपालिकाके शिक्षा शाखासे जारी करल सूचनाअनुसार कुछ दिनयहोर बह्रटी गर्मीके कारण विद्यालयमे अध्ययनरत विद्यार्थीके स्वास्थ्यमे प्रतिकूल असर परे सेक्ना सम्भावनाहे मध्यनजर करटी उ निर्णय करल हो ।
सूचनामे जनाइलअनुसार धनगढी उपमहानगरपालिकाभिटर सञ्चालनमे रहल सक्कु सामुदायिक तथा संस्थागत विद्यालयमे असार ९ गतेसे असार १२ गतेसम (बीचमे पर्ना सार्वजनिक बिदासहित) चार दिन पठनपाठन बन्द रही ।
बिदाके अवधिमे विद्यार्थीहुकनहे घरमे सुरक्षित रहन तथा अत्यधिक गर्मीसे जोग्ना आवश्यक सतर्कता अपनैना अभिभावकहुकनहे समेत आग्रह करल बा ।
धनगढी क्षेत्रमे पछिल्ला दिनमे तापक्रम निरन्तर बह्रटी गैल बा । गर्मीके कारण बालबालिकाके स्वास्थ्यमे असर परे सेक्ना कहटी स्थानीय तहसे विद्यालय बन्द कैना निर्णय करल जनाइल बा । उपमहानगरपालिकासे मौसमके अवस्थाहे निरन्तर निगरानी करटी आवश्यकतानुसार थप निर्णय कैनाफे जनाइल बा ।
