आईपीएल क्रिकेटके सट्टेबाजी करुइया ११ पक्राउ
पहुरा समाचारदाता
धनगढी, १४ बैशाख । भारतके चर्चित इन्डियन प्रिमीयर लिग (आइपीएल) क्रिक्रेट, प्रिमिएर लिग, स्पेनिस ला लिगा फुटबल, यूएफए च्याम्पिएर लिग लगायतमे अनलाइन सट्टेबाजी करुइया ११ जनहनहे महानगरीय अपराध अनुसन्धान महाशाखासे खटल टोली पक्राउ करले बा ।
उहाँहुक्रनहे सूचनाके आधारमे काठमाडौंके टमान स्थानसे पक्राउ करल महाशाखा जनैले बा । पक्राउ परुइयामे कैलालीके धनगढी उपमहानगरपालिका–२ घर होके हाल काठमाडौं महानगरपालिका–१६ बनस्थली बैठुइया ३१ वर्षीय अशोक सिंह, रौतहटके गौर नगरपालिका–१ घर होके हाल ठमेल बैठुइया २८ वर्षीय राहुल कुमार जैसवाल, मोरङके बिराटनगर महानगरपालिका–३ घर होके हाल कालिमाटी बैठुइया ३० वर्षीय संदिप कुमार मंडल, काभ्रेपलाञ्चोक चौरीदेउराली गाउँपालिका घर रहल हाल ठमेल बैठुइया ३६ वर्षीय राजु थापा, धादिङ् गल्छी गाउँपालिका–२ घर रहल हाल ठमेलके ३१ वर्षीय सन्तोष खतिवडा रहल बाटै ।
ओस्टके भारतीय नागरिक समेत उक्त कार्यमे संलग्न रहल आरोपमे पक्राउ परल बाटै । पक्राउ परुइयामे भारतके बिहारके २९ वर्षीय बिक्रम कुमार जैसवाल, ३१ वर्षीय अंकितकुमार कलवार, हिमाञ्चल प्रदेशके सोलन थानाके ४६ वर्षीय सुशिल जेस्टा, राजस्थानके ३१ वर्षीय पवन कुमार शर्मा, राजस्थानके ३० वर्षीय सुचित अग्रवाल ओ बिहारके ४० वर्षीय मुकेश जैसवाल रहल बाटै ।
उहाँहुक्रनसे २ लाख ९६ हजार नगद ओ १७ थान मोबाइल बरामद करल महानगरीय अपराध अनुसन्धान महाशाखाके एसएसपी चन्द्र कुवेर खापुङ बटैलै । उहाँहुक्रे मोवाइल मार्फत ह्वाट्स एपके सहायतासे सट्टेबाजी कराके करोडौंके हार जित करैना करल प्रहरीके प्रारम्भिक अनुसन्धानसे खुलल् बा । पक्राउ परलहुक्रनके थप अनुसन्धान हुइटी रहल बा ।
