मुख्यमन्त्री भट्ट विश्वासके मत पैलैं, माधव नेपाल पक्षके १७ सांसदसे मतदान
काठमाडौं, २५ जेठ । सुदूरपश्चिम प्रदेशके मुख्यमन्त्री त्रिलोचन भट्ट प्रदेश सभामे विश्वासके मत प्राप्त करले बटैं । आज बैठल प्रदेश सभा बैठकमे उहाँ अपनहे विश्वासके मत डेना आग्रह करलमे ३० सांसद पक्षमे मत डेलैं ।
प्रदेश सभामे हुइल मतदानमे नेकपा माओवादी केन्द्रके १३ जाने ओ नेकपा एमालेके माधवकुमार नेपाल समूहके १७ जाने करके ३० जाने मुख्यमन्त्री भट्टहे मत डेले बटैं ।
कुल ५२ सदस्यीय प्रदेश सभामे नेपाली काँग्रेसके १२ जाने तटस्थ बैठल रहैं । नेकपा एमालेके ओली समूहके ७ जाने ओ जनता समाजवादी पार्टीके २ जाने मुख्यमन्त्रीके विपक्षमे मतदान करलैं । नेकपा एमालेके प्रदेश सभा संसदीय दल मुख्यमन्त्रीहे विश्वासके मत डेना निर्णय करले रहे ।
मने एमालेके सुदूरपश्चिम प्रदेश कमिटी भर मुख्यमन्त्रीके विपक्षमे मतदान करना ह्वीप जारी करना प्रदेश सभा संसदीय दलके नेता ओ सचेतकहे आग्रह करले रहे । एमाले ओली पक्षके सांसदहुक्रे पठानसिंह बोहरा, नेपालु चौधरी, लिलाधर भट्ट, माया तामाङ, ग्याल्बु बोहरा, रतन थापा, बलदेव रेग्मी विपक्षमे मतदान करलैं ।
सुदूरपश्चिम प्रदेश सरकारमे नेकपा माओवादी केन्द्र ओ नेकपा एमालेके माधवकुमार नेपाल समूहके सांसदहुक्रे रहल बटैं ।
सम्बन्धित समाचार
