थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०८ कुँवार २६४५, शुक्कर ]
[ वि.सं ८ आश्विन २०७८, शुक्रबार ]
[ 24 Sep 2021, Friday ]

नुक्लिपुर सामुदयिक होमस्टेहे वैधानिकताके प्रमाणपत्र

पहुरा | २३ असार २०७८, बुधबार
नुक्लिपुर सामुदयिक होमस्टेहे वैधानिकताके प्रमाणपत्र

पहुरा समाचारदाता
धनगढी, २३ असार ।
सुदूरपश्चिम प्रदेशके कैलाली जिल्लास्थित गौरीगंगा नगरपालिका–१०, नुक्लिपुरमे संचालन हुई जैटी रहल नुक्लिपुर सामुदायिक होमस्टे वैधानिकताके प्रमाणपत्र पैले बा ।

भाषाकला, संस्कृति, जैविक विविधता ओ पर्यप्रवर्द्धन करी कना नाराके साथ संचालन हुई जैटी रहल उ होमस्टेहे सुदूरपश्चिम प्रदेशके उद्योग, पर्यटन, वन तथा वातावरण मन्त्रालयके शाखा अधिकृत धर्मराज जोशी ओ अधिकृत मानबहादुर साउँद होम स्मे संचालक दिनेश दहितहे होमस्टे संचालन प्रमाणपत्र हस्तान्तरण करले रहिट ।

नुक्लिपुर सामुदायिक होमस्टेसे संचालन बैधानिकता प्रमाणपत्र पाइलसंगे सुदूरपश्चिम प्रदेशमे होमस्टेके संख्या १३ ठो पुगल सुदूरपश्चिम प्रदेशके उद्योग, पर्यटन, वन तथा वातावरण मन्त्रालयके शाखा अधिकृत जोशी बटैलै ।

जौनमन्से १० ठो सुदूरपश्चिम प्रदेशके उद्योग, पर्यटन, वन तथा वातावरण मन्त्रालयमा दर्ता हुइल बटै कलेसे ३ ठो संघसे दर्ता हुइल बटै ।

दर्ता हुइल १३ होमस्टे मन्से ७ ठो सामुदायिक ओ ६ ठो निजि होमस्टे रहल सुदूरपश्चिम प्रदेशके उद्योग, पर्यटन, वन तथा वातावरण मन्त्रालयके अधिकृत मानबहादुर साउँद बटैलै ।

बुधके केल होमस्टे संचालनके प्रमाणपत्र पाइल नुक्लिपुर सामुदयिक होमस्टेमे सुरुमे ६ ठो घरेम होमस्टे संचालन हुइटी रहल संचालक दिनेश दहित बटैलै । अब्बे भर्खर सुरुवाट हो, विस्तारे थप घरेम होमस्टे संचालन कैबी उहाँ कहलै ।

नुक्लिपुर सामुदयिक होमस्टेमे नास्तामे स्थानीय टमान मेरिक परिकारसंगे मकै, ढिकरी चटनी, गोह्ुँक सुख्खा रोटी, अन्डिक रोटी तरकारी, फुलौरी, पकौरा, खुर्मा, बरिया, चिचराके व्यवस्था रहल उहाँ जनैलै ।

होमस्टेमे खानाके परिकारमे घोँघी परिकार, सोझुवा रोटी, पनझझरा, खुर्मा रोटी, लोकल कुखुरा, माछा, हाँसके मासु, बँटैके मासु, सादा खाना, दाल भात, तरकारी, साग (न्युरो) चटनी, साधल गुन्द्रुक, भटमास, चटनी सलाद, ननभेज, रोटी, खीर दुध, दहि, लसुन, धनिया, प्याजके चटनी ओ पेय पर्दाथमे अन्दी धानके, महुवाके रक्सी, (तिनपाने) मकै÷ चाउरके भातके जाँड, महुवा तथा गोहुँक निगार, मार आदि पैना संचालक बटैलै ।

होमस्टेमे मनोरन्जनके साधनमे सखिया नाँच, झुम्रा नाँच, थारु गुरुवा खेल कला प्रर्दशन, स्थानीय कलाकारहुकनके नाँच, सामुहिक नाँच हेरे पैना संचालकहुक्रे जनैले बटै ।

होमस्टेसे अवलोकन करे सेक्ना क्षेत्र थारु डेउथान धार्मिक स्थल थारु संग्राहलय, प्रशिद्ध धार्मिक स्थल मोहन्याल, सिगास, सुनपाल धामके अवलोकन भ्रमण, गोरु गाडामे शान्त बातावरण राष्ट्रिय जंगल घुमघाम, सामुदायिक पोखरीमे बल्छी, कोइलही ताल, दुवरी ताल, चमरैया ताल अवलोकन, थारु हस्ताकलाके अवलोकन, सवडिभिजन वन पार्कके अवलोकन, वन्य जन्तु संरक्षण पोखरी, सरस्वती सामुदायिक वन, सरस्वती सामुदायिक वनको बैज्ञानिक वन नर्सरी अवलोकन, लक्ष्मी सामुदयिक वनमे पर्ना वर्का पटुवा ताल, वास्कोटन ताल, शिव मन्दिर तथा पार्क अवलोकन करे सेक्ना संचालक दहित जनैलै ।

होमस्टेके विधिवत उदघाटन चाही अगहन महिनामे कैना जनाइल बा । यी आघे कैलालीमे भाडागाउँ सामुदायिक होमस्टे, माघी थारुगाउँ सामुदायिक होमस्टे, बसन्ता कोरीडोर थारु होमस्टे, बसेरा थारु होमस्टे संचालनमे रहल बा । कञ्चनपुरमे रानाथारु सामुदायिक होमस्टे, विजयसाल होमस्टे, बैतडीमे सुशिला होमस्टे, विस्ना होमस्टे, बझाङमे मुनाल कृषि तथा पर्यटन होमस्टे, डडेल्धुरामे डोटेली होमस्टे, डोटीमे खप्तड होमस्टे ओ अछाममे कैलाशवेशी एग्रो होमस्टे रहल बा ।

जनाअवजको टिप्पणीहरू