स्वास्थ्य स्वयम् सेविकाहे बृहत पोषण प्याकेज सम्बन्धी तालिम

पहुरा समाचारदाता
हसुलिया, २८ असार । कैलालीके कैलारी गाउँपालिकामे कार्यरत महिला स्वास्थ्य स्वयम् सेविकाहे बृहत पोषण प्याकेज सम्बन्धी तालिम प्रदान करल बा ।

गाउँपालिकामे कार्यरत नौ वडाके १२५ जाने महिला स्वास्थ्य स्वयम् सेविकाहे तीन दिने बृहत पोषण प्याकेज सम्बन्धी तालिम डेहल हो । कोभिड पश्चात डेखल पोषण सम्बन्धी अवस्थाहे लेखाजोखा कैना उद्देश्यके साथ तालिम डेहल गाउँपालिकाके स्वास्थ्य शाखा प्रमुख वीरेन्द्र सापकोटा जानकारी डेलै । ‘कोभिड पश्चात कुछ बालबालिका कुपोषित हुके फेला परल बा, उहाँ कहलै ।

यी आघे, स्वास्थ्यकर्मीहे एक हप्ताके तालिम प्रदान करल रहे । ओकरपाछे स्वास्थ्य संस्थाहरुमार्फत महिला स्वास्थ्य स्वयम् सेविकाहे तालिम प्रदान कैना कार्य रहल सापकोटा बटैलै ।

ओस्टेक करके, गाउँपालिकामे रहल ११ ठो आमा समूहके लाग कोभिड १९ सम्बन्धी सचेतना कार्यक्रमफे सुरु करल बा । ८ ओ ९ वडामे दुई/दुई ओ बाँकी वडामे एक/एक करके सचेतना सम्बन्धी ११ ठो कार्यक्रम करे लागल हो । कुछ वडामे यी कार्यक्रम सम्पन्न हुसेकल बा । बाँकी रहल वडामेफे एक/दुई दिनभिटर कार्यक्रम सम्पन्न हुइना सापकोटा जनैलै ।