थप १९१८ जहनमे कोरोना पुष्टि, १४७५ जाने संक्रमणमुक्त

काठमाडौं, ६ सावन । बिटल २४ घण्टामे नेपालमे १ हजार ९१८ जहनमे कोरोना भाइरस संक्रमण डेखाइल बा । स्वास्थ्य मन्त्रालयके अनुसार टमान प्रयोगशालामे करल पीसीआर परीक्षणमे बुधके थप १ हजार ९१८ जहनमे संक्रमण पुष्टि हुइल हो । यीसँगे नेपालमे कोरोना भाइरससे संक्रमित हुइनाके संख्या ६ लाख ७२ हजार ८७१ पुगल बा ।

पछिल्का २४ घण्टामे थप १ हजार ४७५ जाने संक्रमणमुक्त हुइल बटैं । हालसम ठिक हुइनाके संख्या ६ लाख ३६ हजार ४०२ रहल बा । नेपालमे कोरोना संक्रमणसे थप ३० जहनके मृत्यु हुइल बा । हालसम कोरोनासे मृत्यु हुइनाके संख्या ९ हजार ६३७ पुगल बा ।

हालसम देशभर ३४ लाख ९५ हजार ६९ नमुनाके पीसीआर परीक्षण हुइल बा । क्वारेन्टाइनमे ३०१ जाने रहल बटैं कलेसे आइसोलेसनमे रहल संख्या २६ हजार ८३२ रहल बा ।