थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ११ कार्तिक २६४५, बिफे ]
[ वि.सं ११ कार्तिक २०७८, बिहीबार ]
[ 28 Oct 2021, Thursday ]
.

सचेत हुके डसिया मनाई

पहुरा | २७ आश्विन २०७८, बुधबार
सचेत हुके डसिया मनाई

कोरोना भाइरसके संक्रमण न्यूनिकरण नइहुइल बेला नेपालीहुकनके महान् पर्व डस्या सुरु हुइल बा । कोरोना संक्रमण आउर ढेर फैले सेक्नाओरसे अब्बेक डस्या मनाईबेर अभिन सजकता अपनाई पर्ना अवस्था रहल बा ।

नेपालके दैनिक अभिन करिब हजार जानेसम लौवा संक्रमित ठप्टी रहल अवस्था बा, भारतमे संक्रमण उच्च बा, कलेसे संक्रमणदर काठमाण्डौ उपत्यकामे डेख परल बा, उहाँ बैठुइया हजारौ मनै दैनिक डस्या मनाई जन्मघर लौटटी बाटै, कलेसे विदेशमे रहल नेपालीफे घर अइटी रहल बाटै । नेपालमे कोरोना संक्रमितके संख्या ८ लाख २ हजार ८६१ पुगल बा । ११ हजार २४३ जानेक ज्यानफे जासेकल बा, अभिन सक्रिया संक्रमितके संख्या ३४ हजार ७८७ जाने रहल बटै । डस्या डेवारीमे बाहेर ढेर मनै आ अपन गाउँ अइना, ओरसे यी विच फेरसे संक्रमितके संख्या बह्रना आंकलन करल बा । मने ओसिन नहोए कहटी सबसे सचेत हुइना जरुरी बा । डस्यामे मान्यजन तथा आफन्तजनसे टीका लगाके आर्शिवाद लेना चलन बा, विगतके जस्टे डस्या मनैना शैलीहे निरन्तरता डेना हो कलेसे कोरोना संक्रमणके अवस्था फेरसे भयावह हुई सेक्ना विल्गाइठ ।

डस्यामे मनोरञ्जनात्मक एवं एक आपसमे भेटघाटसेफे सुरक्षात्मक तवरसे मनाई पर्ना बेला बा । डस्यामे साइतअनुसार टीका लगैना चलन बा, कोरोना महामारीके बेलामे साइतहे आधार मानके टीका लगाईबेर भिडभाड हुके संक्रमण सरे सेक्ना ओरसे टीका लगाईबेर मास्क, पञ्जा अनिवार्य रुपमे लगाई परल ।

कोरोना भाइरस जोखिम खासमे छोट–छोट लर्का, वृद्ध अभिभावक तथा दीर्घरोगीहुक्रे रहल बटै । कोरोना महामारीमे घरेम रहल वृद्धवृद्धा, दीर्घरोगी लगायत सक्कु जाने संक्रमणसे सुरक्षित हुइल खण्डमे केल चाडपर्वकेफे सार्थकता हुइना ओरसे सचेत हुके डस्या मनाई, अपने सुरक्षित रहटी घरेम हालसम सुरक्षित रहल वृद्ध अभिभावक तथा दीर्घरोगीहे अप्ठयारोमे नापारी । कोरोना महामारीहे मध्यनजर करटी डस्यामे आफन्तजन भेटघाट हुइल बेलामे नच्ना, गैना, भीडभाड करके खानपिन बनैना जैसिन गतिविधिहे सेकटसम नियन्त्रण करी, डसियाके सक्कुहनहे शुभकामना बा ।

जनाअवजको टिप्पणीहरू