थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]
‘ निर्वाचन तयारी अन्तिम चरणमे ’

परिचयपत्र वितरण ओ मतदान केन्द्र निर्माण सुरु

पहुरा | २८ बैशाख २०७९, बुधबार
परिचयपत्र वितरण ओ मतदान केन्द्र निर्माण सुरु

पहुरा समाचारदाता
धनगढी, २८ वैशाख ।
जनतासे प्रतिनिधि रोजे पैना लोकतान्त्रिक हक अधिकारहे सुनिश्चित कैना वि.सं. २०७९ साल वैशाख ३० गते हुइटी जैटी रहल स्थानीय तह सदस्यके आवधिक निर्वाचन तयारी अन्तिम ओ महत्वपूर्ण चरणमे पुगल बा ।

स्थानीय तह सदस्य निर्वाचनहे स्वच्छ, स्वतन्त्र, निष्पक्ष, विश्वसनीय ओ भयमुक्त वातावरणमे सम्पन्न कैना मुख्य निर्वाचन अधिकृत ओ निर्वाचन अधिकृतके कार्यालयसे सक्कु तयारी पूरा हुइल बा । यी निर्वाचनमे टमान राजनीतिक दलके ३५५ जाने टमान पदाधिकारी निर्विरोध निर्वाचित हुसेकल बटै कलेसे ६ वडा अध्यक्ष सहित ३५ जाने स्वतन्त्र सदस्य समेत निर्विरोध निर्वाचित हुइल बटै । यी निर्वाचनमे १० हजार ७ सय ५६ मतदानस्थलके २१ हजार ९ सय ५५ मतदान केन्द्रसे १ करोड ७७ लाख ३३ हजार ७ सय २३ मतदाता जम्मा ३५ हजार २ सय २१ जाने मन्से निर्विरोध निर्वाचित हुइल बाहेकके पदमे प्रतिनिधि छनौट करेक लाग मतदान करटी बटै ।

मतदान केन्द्रमे आवश्यक हुइना निर्वाचन सामग्री सहित १ लाख ९ हजार ८८ जाने कर्मचारी ओ ६५ हजार ८ सय ६५ जाने स्वयंसेवक आ–अपन मतदान केन्द्रमे पुगसेकल बटै । स्थानीय तह निर्वाचनमे भाग लेना कहिके दर्ता हुइल ७९ ठो राजनीतिक दल मन्से जम्मा ६५ ठो राजनीतिक दल चुनावी प्रतिस्पर्धामे रहल बटै । ५५ हजार ६९८ जाने महिला ओ ८९ हजार ३ सय १३ जाने पुरुष करके टमान राजनीतिक दल ओ स्वतन्त्र उम्मेदवार समेत जम्मा १ लाख ४५ हजार ११ जाने चुनावी प्रतिस्पर्धामे रहल बटै । निर्वाचनमे मतदातासे शान्तिपूर्ण वातावरणमे निर्वाध रुपसे मतदान कैना अधिकारके सुनिश्चितताके लाग शान्ति सुरक्षाके कडा व्यवस्था मिलैना नेपाल सरकार लगायत सम्बन्धित स्थानीय प्रशासनहे आवश्यक निर्देशन डे सेकल ओ उ बमोजिम निर्वाचन सुरक्षा व्यवस्थाहे प्रभावकारी बनाइल बा ।

वैशाख २८ ओ २९ गते सक्कु मतदानस्थलमे मतदान केन्द्रके लाग खटल मतदान टोलीहुकनसे मतदाता परिचयपत्र वितरण ओ मतदाता शिक्षा अन्तर्गत मतदान कैना सहि तरिका सम्बन्धी जानकारी डेटी रहल मुख्य निर्वाचन अधिकृत जयनन्द पनेरु बटैलै ।

पहिल बार मतदाता नामावलीमे नाम दर्ता कराइल नयाँ मतदाता ओ परिचयपत्र हेराइल कहिके सम्बन्धित जिल्ला निर्वाचन कार्यालयमे निवेदन डेहल मतदाताहुकनहे वैशाख २८ ओ २९ गते सम्बन्धित मतदानस्थलसे मतदाता परिचयपत्र वितरण करटी रहल मुख्य निर्वाचन अधिकृत पनेरु बटैलै । । ढेर ढेर मतदाताहुकनहे मतदान सम्बन्धी जानकारी उपलब्ध करैना सरकारी संचार माध्यम लगायत आम संचार माध्यम तथा सामाजिक सञ्जालके प्रयोग करके श्रब्यदृश्यके माध्यमसे टमान जानकारी मूलक सन्देश प्रसारण समेत हुइटी रहल बा ।

मुख्य निर्वाचन अधिकृत, निर्वाचन अधिकृत, स्वयंसेवक लगायत मतदानके कार्यमे खटना सक्कु जनशक्तिहुकनहे टमान चरणमे आवश्यक तालिम तथा प्रशिक्षणके कार्य समेत सम्पन्न हुके मतदान स्थलमे पुगल प्रदेश निर्वाचन कार्यालयके निमित्त प्रमुख प्रेमराज भट्ट बटैलै ।

निर्वाचन आचार संहिता उलङ्घन कैना टमान दल, उम्मेदवार ओ व्यक्तिहे आयोगमे प्राप्त उजुरी ओ जानकारीके आधारमे आचार संहिता विपरीत हुइल कार्य हटैना आदेश डेना, स्पष्टीकरण पुछना, सचेत करैना जैसिन कार्य हुइटी रहल बा कलेसे प्राप्त जवाफके अध्ययन ओ छानविनके कार्य हुूइटी रहल बा । निर्वाचन आचार संहिताके पूर्ण कार्यान्वयनके लाग आयोगसे उल्लंघनके घट्नामे तत्काल कारवाही करे सेक्ना अधिकार समेत डेके १९ ठो उच्चस्तरीय टोली तुलनात्मक रुपमे संवेदनशील ठानल टमान स्थानमे परिचालन करल बा ।

अनुगमन टोलीहे निर्वाचनके गोपनीयतामे प्रतिकूल असर नइपर्ना करके निर्वाचनके कार्यसंग सम्बन्धित दृश्यके छायांकन कैना आवश्यकता अनुसार भिडियो क्यामेरा वा अन्य विद्युतीय उपकरण प्रयोग करके दृश्य छायाकंन करे सेक्ना ओ मौन अवधिमे आमसभा, कार्यशाला, गोष्ठी, सम्मेलन, भोजभत्तेर, पैसा बँटना काम हुइल नइहुइल ओ सामाजिक सञ्जालमे मिथ्या सूचना, दुष्प्रचार ओ द्वेषपूर्ण अभिव्यक्ति डेना काम हुइल नइहुइल अनुगमन करके ओसिन कार्य हुइल/करल पैलेसे तत्काल आवश्यक कारवाही करके आयोगहे जानकारी करैना अधिकार डेहल बा ।

मौन अवधिमे कौनो माध्यमसे निर्वाचन प्रचार प्रसार कैना ओ मतदाताहे प्रभाव पर्ना मेरिक कौनोफे गतिविधि करे नइपैना ओरसे ओरसे उ अवधिमे उम्मेदवार, दलके कार्यकर्ता तथा सम्बन्धित व्यक्तिहुकनके सम्बन्धमे निगरानी धारके ओसिन गतिविधि हुई नइडेना तथा मतदानके दिन मतदाताहे सुरक्षित रुपमे मतदान केन्द्रसम पुग्न ओ मतदान केन्द्रसे लौटे सेक्ना वातावरण निर्माण करे पर्ना हुइल ओरसे मतदाताहे कौनोफे प्रकारके अवरोध हुई नइडेना आवश्यक व्यवस्था मिलैना मुख्य निर्वाचन अधिकृत, निर्वाचन अधिकृत तथा सक्कु स्थानीय प्रशासनहे आयोगसे निर्देशन समेत डेले बा ।

निर्वाचनके व्यवस्थापकीय कार्यहे थप सहज बनैना, राजनीतिक दल तथा उम्मेदवारसे हुइना अवाञ्छित गतिविधिहे रोक्न तथा मतदानके लाग सुरक्षित तथा भयरहित वातावरण सिर्जना कैना निर्वाचनमे मौन अवधि आवश्यक रहल आयोग जनैले बा ।

यी अवधि मतदानके समयसे ४८ घन्टा अगाडि अर्थात् वैशाख २७ गते मंगर रात १२ बजेसे शुरु हुइल बा । यी अवधिमे राजनीतिक दलके पदाधिकारी वा उम्मेदवार तथा दलके भातृ संगठन वा सम्बन्धित व्यक्तिसे निर्वाचन प्रचार प्रसार लगायत कौनो फे मेरिक छलफल, अन्तरक्रिया, सभा सम्मेलन, कार्यशाला गोष्ठी आदि करे नइडेना, राजनीतिक दल वा उम्मेदवारके प्रचार प्रसारके सामग्री राखल हुइलेसेफे तत्काल हटाई पर्ना, कौनोफे विधि, प्रक्रिया वा माध्यमसे मत मग्न वा निर्वाचन प्रचार प्रसार करे नइहुइना, सामाजिक सञ्जाल, अनलाईन, छापा वा अन्य कौनो माध्यमसे राजनीतिक दल वा उम्मेदवारके पक्ष वा विपक्षमे कौनो सन्देश, सूचना वा प्रचार प्रसारके सामग्री पोष्ट वा शेयर कैना, कराई नइहुइना ओरसे यी बमोजिम आचरण पालन करडेना सम्बन्धित सक्कुहुनमे आयोग आग्रह करले बा ।

मतदानके कार्य सम्पन्न नइहुइटसमके लाग सक्कु अन्तर्राष्ट्रिय सीमासे हुइना आवतजावत ओ मतदान हुइना दिन आन्तरिक रुपमे सञ्चालन हुइना सक्कु मेरिक यातायात बन्द कैना व्यवस्था मिलाइल बा । उम्मेदवार ओ अत्यावश्क सेवाके लाग सवारी आवागमन अनुमतिके मापदण्ड जारी करके पास उपलब्ध करैना व्यवस्था करल बा । निर्वाचनमे शान्ति सुरक्षाके स्थिति कायम रख्न मौन अवधि शुरु हुइलपाछे मतदानके कार्य सम्पन्न नइहुइटसमके लाग स्थानीय प्रशासनके समन्वयमे तोकल क्षेत्रमे मादक पदार्थके बिक्री वितरण ओ सेवन कैना सख्त निषेध करल बा ।

निर्वाचन आचारसंहिता उल्लंघनके अनुगमनके लाग टमान तहमे संरचना बनाइल बटै । आयोगके अनुगमन हेर्ना आयुक्तके संयोजकत्वमे केन्द्रीय आचारसंहिता अनुगमन समिति, जिल्लामे मुख्य निर्वाचन अधिकृतके संयोजकत्वमे जिल्ला आचारसंहिता अनुगमन समिति ओ स्थानीय तहमे निर्वाचन अधिकृतके संयोजकत्वमे स्थानीय तहके आचारसंहिता अनुगमन समितिके प्रबन्ध करल बा ।

यी संरचनाके अतिरिक्त विशेष संवेदनशील मानल जिल्ला ओ पालिकामे विशेष अनुगमनके लाग अधिकार प्रत्यायोजन सहित विशेष अनुगमन टोली खटाइल बा । उ टोली आचारसंहिता विपरीत दल ओ उम्मेदवारसे झण्डा, चिन्ह ओ गाडी प्रयोग करलेसे, अनधिकृतरुपमे सामानके ओसारपसार वा नगद वा जिन्सी वितरण करल पैलेसे कब्जामे लेके तत्काल कारबाही करे सेक्ना अधिकार डेहल बा । निर्वाचनमे सुरक्षाके प्रत्याभूति हुइना करके आवश्यक व्यवस्था मिलाइल बा । जेम्ने अन्तरगत नेपाली सेना सहित तीन घेराके सुरक्षा प्रबन्ध करल बा ।

वालिग मताधिकारके आधारमे संविधानसे सक्कु नेपाली जनताहे निर्वाचनमे सहभागी हुइना अधिकार डेहल बा । यी अधिकारके प्रयोग कैना यिहे वैशाख ३० गते हुइना स्थानीय तह सदस्यके निर्वाचनमे केक्रो डर, धाकधम्की ओ त्रास नइमानके निर्धक्क हुके अपने रोजल प्रतिनिधिहे मतदान कैना आयोग सक्कु मतदाताहुकनहे हार्दिक अपिल करटी ।

जनाअवजको टिप्पणीहरू