थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

यौनिक तथा लैङिक अल्पसख्यक समुदायके मुद्दा चुनावी एजेण्डाके माग

पहुरा | ४ आश्विन २०७९, मंगलवार
यौनिक तथा लैङिक अल्पसख्यक समुदायके मुद्दा चुनावी एजेण्डाके माग

पहुरा समाचारदाता
धनगढी, ४ कुवाँर ।
यौनिङ तथा लैङिक अल्पसंख्यक समुदायके मुद्धा राजनीतिक दलके चुनावी एजेण्डा बनैना माग करल बा ।

ब्लु डायमण्ड सोसाईटीसे धनगढीमे स्थानीय राजनीतिक दलहुकनसंग करल छलफलमे यैसिन माग करल हो । आसन्न अगहनमे हुइना प्रदेश ओ प्रतिनिधि सभाके निर्वाचनके तयारीमे जुटल राजनीतिक दलहुकनसंग सोसाईटीसे यैसिन माग करल हो । ‘राजनीतिक दलहुक्रे चुनावी घोषणापत्रके गृहकार्यमे रहल बटै’ ब्लु डायमण्ड सोसाईटीके कार्यक्रम व्यवस्थापक भूमिका श्रेष्ठ बटैली । ‘समुदायमे यौनिङ तथा लैङिक अल्पसख्यक समुदायके व्यक्तिहुकनप्रति हेर्ना नजर अभिन सुधार हुइल नइहो । ओकर लाग राजनीतिक दलके भूमिका महत्वपूर्ण रही ।’ ब्लू डायमण्ड सोसाईटीके मुद्दामे राजनीतिक दलहुक्रे सम्बोधन करे पर्ना उहाँ प्रस्तुत करल कार्यपत्रमे उल्लेख करले बटी ।

उहाँ प्रस्तुत करल कार्यपत्रमे यौनिक तथा लैङिक अल्पसख्यक समुदायके व्यक्ति सक्षम रहटी रहटीफे अवसर नइपाइल उल्लेख करली । विद्यालयमे हेर्ना नजर अभिन सुधार नइहुइल उहाँ बटैली । आव दलहुक्रेफे निर्वाचनमे अपन समुदायके मुद्दामेफे चुनावी एजेण्डा बनाई पर्ना उल्लेख करली ।

कार्यक्रममे सहभागि राजनीतिक दलहुक्रे अपन ओरसे यौनिक तथा लैङिक अल्पसंख्यक समुदायके मुद्दामे संवेदनशिल रहल प्रतिवद्धता जाहेर करलै । नेपाली काँग्रेसके युवा नेता तपेन्द्र भुषाल अपन ओरसे पूर्ण सहयोग रहल बटैटी पार्टीके टमान निकायमे यौनिक तथा लैङिक अल्पसंख्यक समुदायके व्यक्तिहुकनहे रख्न पहल कैना बटैलै ।

‘काँग्रेस यौनिक तथा लैङिक अल्पसख्यक समुदायके मुद्दामे संवेदनशिल बा’, उहाँ कहलै ‘पार्टीके घोषणापत्रमेफे समावेश हुइठ ।’ ओस्टेक नेकपा माओवादी केन्द्र कैलालीके नेता रमेश धामीफे यौनिक तथा लैङिक अल्पसंख्यक समुदायके मुद्दामे अपन पार्टी गम्भीर ढंगसे आघे बढल बटैलै । ‘माओवादी केन्द्र यौनिक तथा लैङिक अल्पसंख्यक समुदायके मुद्दामे काल्हफे संवेदनशिल रहे, अब्बेफे बा, उहाँ कहलै ।

कार्यक्रममे एकीकृत समाजवादी कैलालीके नेता दिनेश चन्द सुवेदी यौनिक तथा लैङिक अल्पसख्यक समुदायके मुद्दामे प्रतिवद्धता व्यक्त करलै । ‘पार्टीमे चुनावी घोषणा पत्र बन्ना क्रम जारी रहल बा, उहाँ कहलै । ‘यहाँहुकनके मुद्दामेफे समावेशके लाग दबाब डेम ।’

जनाअवजको टिप्पणीहरू