थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

डा. केसीहे लेहे आइल हेलिकप्टर खाली लौटल

पहुरा | ४ आश्विन २०७९, मंगलवार
डा. केसीहे लेहे आइल हेलिकप्टर खाली लौटल

पहुरा समाचारदाता
धनगढी,४ कुवाँर ।
धनगढीमे सत्याग्रहमे रहल प्राध्यापक डा. गोविन्द केसी थप उपचारके लाग काठमाडौं जाईक मन नइकरलै ।

९ दिनसे धनगढीमे सत्याग्रहमे रहल केसीके स्वास्थ्य अवस्था विग्रटी गैलपाछे उहाँहे लेहे गृह मन्त्रालयसे हेलिकप्टर आइल रहे । मने प्राध्यापक डा. केसी अपनहे जवरजस्त लैजाई खोजल आरोप लगैलै । उहाँहे लेहे गृह मन्त्रालयहे हेलिकप्टरमार्फत काठमाडौं लैजाडेना अनुरोध करलपाछे मंगर दुपहर नेपाली सेनाके हेलिकप्टर डाक्टर केसीहे लेहे धनगढी आइल रहे । ‘हलिकप्टर आइल । मने, डाक्टर केसी नइमन्लै । उहाँ काठमाडौं नइजैम कहलै । जबरजस्ती करलेसे अपहरण करल जैसिन हुई, महीहे अपहरण करके नलैजाउ कहलै’ डाक्टर केसीके उपचारमे संलग्न डाक्टर अमृत जैशी कहलै । ‘डाक्टर केसीहे नेपाली सेनाके स्कटिङमे विमानस्थलसम लैजैना ओ उहाँसे सेनाके हेलिकप्टरमे काठमाडौं लैजैना कहिके प्रहरी अस्पताल आइल रहे ।’ डाक्टर केसी अपने सेती प्रादेशिक अस्पतालमे उपचाररत रहना मने काठमाडौं नइजैना बटाइलपाछे प्रहरीके टोली लौटल रहे । डाक्टर केसीहे सेती प्रादेशिक अस्पतालसे विमानस्थलसम लैजैना बेला धनगढीके टमान चोकमे भारी संख्यामे प्रहरी तैनाथ करल रहे ।

गेटा मेडिकल कलेज सञ्चालन सहितके चिकित्सा सुधारके माग रख्टी डाक्टर केसी धनगढीमे सत्याग्रहमे बटै । डाक्टर केसीहे जवरजस्ती लैजाई खोज्लेसे स्थानीय सडकमे अइना सम्भावना डेखलपाछे सेती प्रादेशिक अस्पतालमे भारी संख्यामे प्रहरी परिचालन करल रहे कलेसे धनगढीके मुख्य÷मुख्य चोक ओ मुख्य बजारमेफे प्रहरी तैनाथ करल रहे । यी आघे मंगर सकारे सुदूरपश्चिम सरकारके ओरसे सामाजिक विकास मन्त्री गोविन्द बोहराफे डाक्टर केसीहे काठमाडौं जाइक लाग आग्रह करल रहिट । डाक्टर केसी प्रदेश सरकारके उ बाट फे नकार डेहल रहिट ।

भदौ २६ गते धनगढीके कृष्ण मन्दिरमे सत्याग्रहमे बैठल डाक्टर केसीहे तीन दिनमे स्वास्थ्य अवस्थामे समस्या आइलपाछे, सेती प्रादेशिक अस्पतालमे भर्ना करल रहे । उहाँक स्वास्थ्य अवस्था दिनप्रतिदिन जटिलता ओर जैटी रहल उपचारके संलग्न चिकित्सकहुक्रे जनैले बटै ।

डाक्टर केसीके अक्सिजनके लेवल घटटी रहल, पेटमे अल्सर हुके आन्तरिक रक्तश्राव हुइटी रहल, तीन किलो तौल घटल, मांसपेसी सिक्चे लागल कहटी सेती प्रादेशिक अस्पतालके चिकित्सकहुक्रे उहाँहे विशिष्टकृत सेवा रहल अस्पतालमे रेफर करसेकल बटै । मनेफे डाक्टर केसी मानल नइहुइट । उहाँ, गेटामे अस्पताल सञ्चालन करके मेडिकल शिक्षाके तुरुन्ते पढाई हुई पर्ना माग सहित चिकित्सा क्षेत्र सुधारके लाग विगतके सरकारहुक्रे करल सहमति कार्यान्वयनके माग करले बटै । जिल्ला प्रशासनके कार्यालय, कैलालीके सूचना अधिकारी शिवराज जोशी कहलै– हम्रे मनैना प्रयास करली, मने उहाँ नइमन्लै । सेनाके हेलिकोप्टर ढेर समय बैठे नइसेक्ना हुइल ओरसे काठमाडौं फिर्ता गैल बा ।’

स्वास्थ्य क्षेत्रके समग्र सुधारके सात बुँदे मागसहित डाक्टर केसी नौ दिनआघे धनगढी–१, एलएनचोकस्थित कृष्णमन्दिरके धर्मशालामे २० औं सत्याग्रह सुरु करल हुइट । उहाँक स्वास्थ्यस्थिति बिग्रे लागलपाछे दुई दिनपाछे सेती प्रादेशिक अस्पताल लैगिल रहे ।

जनाअवजको टिप्पणीहरू