थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

विपदके बेला महिला ओ बालबालिका ढेर प्रभावितः गापा अध्यक्ष राजसमझ

पहुरा | ५ आश्विन २०७९, बुधबार
विपदके बेला महिला ओ बालबालिका ढेर प्रभावितः गापा अध्यक्ष राजसमझ

पहुरा समाचारदाता
हसुलिया, ५ कुवाँर ।
प्राकृतिक प्रकोप÷विपद जिहीफे असर करे सेक्ना मने महिला ओ बालिकाहे सबसे ढेर प्रभावित हुइना करल कैलारी गाउँपालिकाके अध्यक्ष राजसमझ चौधरी बटैलै ।

मंगरके रोज हसुलियामे ‘विपद आपतकालिन अवस्थामे लैङिक हिंसा रोकथाम तथा प्रतिकार्यके लाग हुइल अन्तरक्रिया’ कार्यक्रममे उहाँ विपदके बेला महिला, बालबालिका, गर्भवती, सुत्केरी महिला, अशक्त ओ अपाङता रहल व्यक्ती ढेर प्रभावित हुइटी रहल कार्यक्रमके वडका पहुना रहल गाउँपालिका अध्यक्ष बटैलै ।

प्राकृतिक प्रकोप÷विपद आइलपाछे घरसे विस्थापित हुइबेर सबसे ढेर पीडा महिला ओ बालबालिकाहे भोगे परठ,’ गाउँपालिका अध्यक्ष राजसमझ कहलै, ‘विपद आपतकालिन अवस्थामे महिला लैङिक हिंसामे परेसेक्ठै । परिस्थिितके मौका जेफे उठाई सेक्ठै । उ समयमे लैङिक हिंसा रोकथाम तथा प्रतिकार्यके लाग सरोकारवालासे ढेर ध्यान पुगाई परठ ।’ अब्बेक समयमे ढेर जैसिन महिलाहुक्रे लैङिक हिंसामे परल मने फाटफुट रुपमे पुरुषफे हिंसामे परल उहाँ बटैलै ।

उहे विच गाउँपालिका अध्यक्ष फुइयाँफाटाबासी रहर नइहुके बाध्यतासे लौव ठाउँमे बसाई सरल बटैलै । उहाँ कहलै, ‘फुइयाँफाटाबासीके सक्कु पैतृक सम्पति पुरान ठाउँमे बाटीन । बाढ प्रकोपसे पुरान ठाउँमे बैठे नइसेक्ना अवस्था आइलपाछे लौवा ठाउँमे निश्चित जग्गामे बैठना बाध्य बटै ।’ असार महिनामे आइल बाढसे फुइयाँफाँटा÷रामपुर ओ बसन्ताके कटैनी लडियक दुई ठो काठे पुल पुहाइल कारण बर्खक बेला वडा नम्बर ७ के बासीहुकन ढेर सास्ती भोगे परल अध्यक्ष बटैलै ।
गाउँपालिकाके आर्थिक सहयोग ओ स्थानीयहुकनके जनश्रमदानसे दुनु काठे पुल फेरसे बनागिल ओ स्थानीयहुकनके माग अनुसार वडा नम्बर ७ मे यिहे आर्थिक बर्षमे एक ठाउँमे पक्की पुल बन्ना अध्यक्ष राजसमझ चौधरी बटैलै ।

कार्यक्रमके विशिष्ट पहुना कैलारी गाउँपालिका उपाध्यक्ष भगवतीकुमारी चौधरी महिलाहुकन अभिनफे निर्धक्कसे नेंगघुम करे सेक्ना अवस्था नइरहल बटैली । महिलाके मनमे ढेर पीडा रहठ,’ विशिष्ट पहुना उपमध्यक्ष कहली, ‘अभिनफे सक्कु बाट बोले सेक्ना अवस्था नइहो । पितृ सतात्मक समाज बा । कहु गैलेसे पुरुष केल नाही महिला डिडीबहिनियाफे बाट कटना करठै ।’

विपदमे बेला ढेर जैसिन महिला लैङिक हिंसामे परे सेक्ना सम्भावना रहल उपाध्यक्ष बटैली । ओस्टेक उहाँ कैलारीके वडा नम्बर ५ ओ ७ मे स्नेह केन्द्र (बालबालिका मैत्री स्थल) संचालन आइलपाछे बाढ प्रभावित क्षेत्रके सुत्केरी, गर्भवती, जेष्ठ नागरिक, अपाङता हुइल व्यक्ति, किशोरीहुकनहे लैंगिक हिंसाके जोखिमसे सुरक्षित राख्नामे सहयोग पुग्ना बटैली ।

कार्यक्रममे कैलारी गाउँपालिका वडा नम्बर ४ अध्यक्ष तथा विपद व्यवस्थापन समितिके संयोजक ठागुराम चौधरी विपदसे प्रभावित÷ विस्थापितहुकनके लाग पहल हुइटी रहल बटैलै । कैलारी गाउँपालिका वडा नम्बर १ के अध्यक्ष धोजहरिपाल बोहरा वडा नम्बर ५ ओ ७ के बाढ प्रभावित महिलाहुकनके सहभागितामे हुइल कार्यक्रममे ओरेक नेपालके जिल्ला संयोजक विनु राना, तरङगिनी फाउण्डेशनके फिल्ड अफिसर सरिता चौधरी सहजीकरण करल रहिट ।

राष्ट्रिय महिला मानव अधिकार रक्षक संजाल कैलालीके अध्यक्ष अम्बिका भण्डारीके अध्यक्षतामे हुइल कार्यक्रमके संचालन संजालके जिल्ला सचिव मिना चौधरी करले रहिट । कार्यक्रम तरङगिनी फाउण्डेशनके आयोजना, कैलारी गाउँपालिकाके समन्वय ओ केयर नेपालके आर्थिक सहगोगमे हुइल रहे ।

जनाअवजको टिप्पणीहरू