थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

कान्द्रा लडियाके जोखिममे मुर्गाहुवा गाउँ

पहुरा | ६ आश्विन २०७९, बिहीबार
कान्द्रा लडियाके जोखिममे मुर्गाहुवा गाउँ

जीवन चौधरी
पहलमानपुर, ६ कुँवार ।
कान्द्रा लडियाके कटानसे घोडाघोडी नगरपालिका वडा नम्बर ११ के मुर्गाहुवा गाउँ जोखिममे परल बा ।

लडियाके तीब्र कटानसे पुरा गाउँ नै जोखिम रहल गाउँक भलमन्सा राम बहादुर चौधरी बटैलै । ‘हरेक साल लडियामे अइना बाढ ओ हुइना कटानसे गाउँ नै जोखिममे बावै’, भल्मनसा चौधरी कहलै–‘अब्बेसम गाउँक ५० बिघासे ढिउर जग्गा जमिन कटानी हुइल बा कलेसे २५ बिघामे लगाइल धान फेन पटानी कैके नोक्सान हुइल बा ।’

भदौ ३१ गतेसे अविरल बर्षा हुइलपाछे शनिच्चरके आइल बाढ ओ तिब्र लडियाके कटानसे गाउँ नै विस्थावित हुइना अवस्था आइल हो ।

इहे बिच लडियाके कटानसे मुर्गाहुवा गाउँमे रहल श्रीराम जानकी मन्दिर फेन जोखिममे परल मन्दिर व्यवस्थापन समितिके अध्यक्ष चन्द्र बहादुर चौधरी जानकारी डेलै ।

मन्दिर क्षेत्र आसपास रहल ८ बिघासे ढिउर जग्गा लडिया काटके लैगिलपाछे मन्दिर जोखिममे रहल जनाइल बा । शनिच्चरके आइल बाढसे मन्दिरहे जोखिममे पारल अध्यक्ष चौधरी जानकारी डेलै ।

‘एक ओर लडिया गाउँहे उठीबास बनाइ लागल बावै’, अध्यक्ष चौधरी कहलै–‘गाउँक सँगे मन्दिर फेन कटानी कैकै लैजिना अवस्था रहल बा, गाउँ ओ मन्दिर काटके लैगिलेसे हमार नाउँनिसान हेराजाइ ।’

२०५३ सालमे निर्माण हुइल मन्दिर २०७५ साल दर्ता प्रक्रिया पुरा करल मन्दिर व्यवस्थापन समितिके पूर्व अध्यक्ष छेदालाल कठरिया जानकारी डेलै । पूर्व अध्यक्ष कठरिया मन्दिर निर्माणमे २२ लाख रुपियासे ढिउर खर्च लागल जानकारी डेलै ।

कान्द्रा लडियासे गाउँ नै उठीबास हुइना कहटी गाउँक बुद्धिजिवी प्रदेशु चौधरी चिन्ता व्यक्त करलै । उहाँ लडियासे गाउँहे बचाइक लाग संघ, प्रदेश ओ स्थानीय सरकार विशेष ध्यान डेहे पर्ना औंल्याइलै । साथे उहाँ लडियामे तत्बन्ध तथा लडिया नियन्त्रण समयमे कैना अनुरोध करलै ।

जनाअवजको टिप्पणीहरू