सुदूरपश्चिममे डेङु संक्रमित संख्या ८०४

सबसे संक्रमित कैलालीमे २९८ जाने

पहुरा समाचारदाता
धनगढी, ११ कुवाँर । सुदूरपश्चिम प्रदेशमे साउन–भदौ डेङु संक्रमितके संख्या बह्रल बा । सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार डेङके संक्रमित विमारीके संख्या ८ सय ४ पुगल जनागिल बा ।

सुदूरपश्चिम प्रदेशके कैलालीमे सबसे ढेर २ सय ९८ जाने संक्रमितके संख्या रहल बा । ओस्टेक करके दार्चुलामे २ सय ८ जाने, कञ्चनपुरमे १ सय १ जाने, डोटीमे ६८ जाने, बैतडीमे ३९, डडेल्धुरामे ३०, अछाममे डेङु संक्रमित २४ जाने पुगल निर्देशनालय जनैले बा । ओस्टेक करके बाजुरामे १४, बझाङमे २२ जाने संक्रमित रहल बटै ।

देशभर एक्के दिन डेंगुसे १ हजार ५१ जाने संक्रमित ठप्लै

पछिल्का २४ घण्टामे डेंगुके कारण एक हजार ५१ जाने संक्रमित ठपल बटै । स्वास्थ्य तथा जनसंख्या मन्त्रालयके अनुसार, सोम्मारसम २५ हजार ५४३ जनहनमे डेंगु पुष्टि हुइल बा । यी आघे अँटवारसम २४ हजार ४९२ जनहनमे डेंगु संक्रमण हुइल रहे ।

अभिनसम डेंगु संक्रमणके कारण ३२ जानेक मृत्यु हुइल बा । मन्त्रालयके अनुसार अभिनसम सबसे ढेर बागमती प्रदेशमे १९ हजार ९१० मे डेंगु संक्रमण हुइल बा ।

ओस्टेक करके लुम्बिनी प्रदेशमे २ हजार ८८७, प्रदेश १ मे ७७५, गण्डकीमे ५५६, मधेशमे ३८० ओ कर्णालीमे २३१ जनहनमे डेंगु संक्रमण हुइल बा । नेपालमे एडिज प्रजातिके मच्छरसे सर्ना डेंगु नेपालमे पहिल बार २०६१ मे डेंगुके बिरामी डेखल रहिट ।
हालसम देशभरके ७६ जिल्लामे डेंगु संक्रमण फैलल ओरसे यिहीहे ‘प्रकोप’ घोषणा कैना तयारी करले बा । संक्रमितके संख्या दिनदिने बढटी रहल ओरसे सतर्कता अपनैना स्वास्थ्य मन्त्रालयसे आग्रह करले बा ।

कञ्चनपुरमे डेङु परीक्षण कैना किट अभाव

कञ्चनपुरमे डेङुके बिरामीके परीक्षण कैना किट अभाव हुके समस्या हुइल बा । सरकारसे डेङु परीक्षण निःशुल्क कैना कहलेसेफे किट अभाव हुके गम्भीर बिरामीके परीक्षण करे नइसेकल स्वास्थ्यकर्मी बटैठै ।

महाकाली प्रादेशिक अस्पतालके निमित्त मेडिकल सुपरिटेन्डेन्ट डा अर्जुन भट्ट डेङुके बिरामीके परीक्षण कैना किट अभाव हुई लागलपाछे अस्पताल व्यवस्थापन समिति अपनही किट खरिद कैना ओ परीक्षण करल शुल्क लेना निर्णय करल बटैलै ।

‘सरकारसे निःशुल्क परीक्षण कहलेसेफे प्रदेश सरकारसे पर्याप्त किट उपलब्ध नइहुइल, बिरामीके चाप बह्रटी बा, उहाँ कहलै, ‘अभिन अस्पताल अपनही किट खरिद कैना ओ परीक्षण करल बिरामीसे शुल्क लेना निर्णय करले बा ।’

उहाँ अस्पतालमे डेङुके बिरामी बह्रल बटैलै । प्रदेश सरकारसंग किट माग करलेसेफे ३०/४० ठो केल पठैना ओ उहीसे एक दिनसमेत नइपुग्न उहाँ बटैलै ।

जिल्ला स्वास्थ्य कार्यालय कञ्चनपुरसेफे परीक्षण कैना किट अभाव रहल जनैले बा । स्वास्थ्य कार्यालय कञ्चनपुरके औलो निरीक्षक सिद्धराज भट्ट बिरामीके संख्या बह्रटी गैल ओरसे किट अभाव हुइल बटैलै । ‘जिल्लामे बिरामीके संख्या बह्रटी गैल बा, हमनरथेन पर्याप्त किट नइहो, उहाँ कहलै, ‘स्वास्थ्य कार्यालयसे करिब चार सय किट नौ पालिकामे पठैना काम हुइटी रहल बा ।’

जिल्ला स्वास्थ्य कार्यालय कञ्चनपुरके तथ्याङकअनुसार हालसम जिल्लामे एक सय १२ जनहनमे संक्रमण डेखल बा । उ मन्से सबसे ढेर महाकाली प्रादेशिक अस्पतालमे ४० ओ दोधारा चाँदनी नगरपालिकामे ३६ जनहनमे संक्रमण डेखल बा ।

पुनर्वास नगरपालिकामे १२, बेलडाँडीमे तीन, कृष्णपुर, बेलौरी ओ लालझाडीमे दुई/दुई ओ टमान निजी प्रयोगशाला ओ अस्पतालमे १५ जनहनमे संक्रमण डेखल बा । दोधारा चाँदनी नगरपालिकामे संक्रमित डेखल ३६ जाने मन्से २२ जाने भारतसे ओ आठजाने काठमाडौँसे लौटल रहुइया बटै ।

प्रदेशमे ११ कोरोना संक्रमित ठप्लै

सुदूरपश्चिम प्रदेशमे पछिल्का २४ घण्टामे ११ जाने कोरोना संक्रमित ठपल बटै । सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार ६ सय ९७ जानेक एन्टीजेन ओ आरटी पिसिआर विधिसे कोरोना परिक्षण करेबेर ११ जनहनमे संक्रमण डेखल हो । एन्टीजेन विधिसे ६ सय ७३ जानेक ओ आरटी पिसिआर विधिसे २४ जानेक कोरोना परिक्षण करल निर्देशनालय जनैले बा । सुदूरपश्चिम प्रदेशमे अब्बेसम पीसिआरके २१ एन्टीजेनक १७ करके ३८ जाने कोरोनाके सक्रिय संक्रमित रहल बटै ।

भारतसे अक्के दिनमे १६ सय २२ जाने लौटलै । डस्या सुरु हुइलसंगे सुदूरपश्चिम प्रदेशके टमान नाकासे अक्के दिनमे १ हजार ६ सय २२ जाने नेपाल भिछरल बटै ।

ढेर जैसिन रोजगाारीके लाग ओ कुछ मनै काम विशेषसे भारत गैल नेपाली डस्या मनाइल स्वदेश लौटना क्रम बह्रल सुदूरपश्चिम प्रदेश सामाजिक विकास मन्त्रालय जनैले बा । मन्त्रालयसे डेहल जानकारी अनुसार सबसे ढेर गडडाचौकी भन्सार कञ्चनपुरसे ९ सय ९६ जाने नेपाल लौटल बटै ।

ओस्टेक करके गौरीफन्टा नाका कैलालीसे ५ सय ९४ जाने, जुलाघाट नाका वैतडीसे ३० जाने ओ पुलघाट नाका दार्चुलासे २ जाने करके १ हजार ६ सय २२ जाने एक्के दिनमे नेपाल लौटल हुइट । नेपाल लौटुइया मन्से ६ सय ३८ जानेक कोरोना परिक्षण करेबेर २ जनहनमे संक्रमण डेखलफे निर्देशनालय जनैले बा ।