कैलारीमे पालिका स्तरीय खाद्य अधिकार सञ्जाल गठन

पहुरा समाचारदाता
हसुलिया, १२ कुवाँर । कैलालीके कैलारी गाउँपालिकामे पालिका स्तरीय खाद्य अधिकार सञ्जाल गठन हुइल बा ।

परिवर्तनका लागि कार्यरत युवा समुह (याक) नेपालके आयोजनामे बुधके रोज हसुलियामे हुइल एक कार्यक्रममे माया चौधरीके संयोजकत्वमे १५ सदस्यीय पालिका स्तरीय सञ्जाल गठन हुइल हो । सञ्जालके उपसंयोजकमे कल्लु प्रसाद डगौराथारु, सचिवमे बनसराम चौधरी रहल बटै ।

ओस्टेक करके सञ्जालके सदस्यमे आशिष चौधरी, पुष्पा चौधरी, पवित्रा विक, पवित्रा न्यौपाने, बिन्द्रा चौधरी, चेरिया चौधरी, जया चौधरी, आशा चौधरी, सीता चौधरी, प्रेरणा चौधरी, दुर्गा प्रसाद चौधरी ओ दाउराम चौधरी रहल बटै ।
ओस्टेक करके संजाल गठन आघे परिवर्तनका लागि कार्यरत युवा समुह (याक) नेपालके महासचिव हृदय पुजाराके अध्यक्षतामे हुइल कार्यक्रममे उहाँ खाद्य अधिकार ओ खाद्य अधिकार हननके सवालहे उठान, पैरबी कैना संजाल गठन करल बटैलै ।

कार्यक्रममे (याक) नेपालके खाद्य अधिकार सवलीकरण परियोजना संयोजक देवी खनाल खाद्य अधिकार, खाद्य सञ्जालबारे प्रस्तुतीकरण करले रहिट । उहाँ खाद्य अधिकार प्रत्याभुतिके लाग सरकारके दायित्व, सञ्जालके सिद्धान्त ओ सञ्जालसे उठाई पर्ना सवालबारे जानकारी डेहल रहिट । ओस्टे करके गाउँपालिकामे गठन हुइल पालिका स्तरीय खाद्य अधिकार सञ्जालसे सार्वजनिक सुनुवाई, पत्रकार सम्मेलन, प्रेस विज्ञप्ती, ध्यानाकर्षण, सुझावपत्र बुझाई सेक्ना सवलीकरण परियोजना संयोजक खनाल बटैलै ।

कार्यक्रममे सहजीकरण करटी याक नेपालके परियोजना अधिकृत प्रदीपकुमार चौधरी संजालसे गरिवी तथा पाछे पारलहुकनके पक्ष लेना, हिंसारहित सामुहिक कार्य करे पर्ना बटैलै । कार्यक्रममे वन उपभोक्ता समुह, क्ववके प्रतिनिधि, कृषक समुह, सहकारी संस्थाके प्रतिनिधि, महिला संजालके प्रतिनिधिहुकनके सहभागिता रहल रहे ।