हप्ताभरिम १२ हजार नेपाली भारतसे लौटलै
विफे ४३ सय १२ जाने नेपाल प्रवेश
पहुरा समाचारदाता
धनगढी,१३ कुवाँर । डसिया लच्क्याइलसंगे भारतमे रोजगारीके लाग गैल नेपाली घर लौटना क्रम ह्वाटे बह्रल बा ।
सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार कुवाँर ७ गते पाछे विफेक रोजसम प्रदेशके टमान नाका हुइटी १२ हजार ५ जाने भारतसे नेपाल लौटल बटै । सबसे ढेर विफेक रोज ४ हजार ३ सय १२ जाने नेपाल लौटल स्वास्थ्य निर्देशनालय जनैले बा ।
रोजगारीके लाग भारत गैल जैना आइना नेपालीके तथ्याङक सुदूरपश्चिम प्रदेशके गडडाचौकी भन्सार कञ्चनपुर, गौरीफन्टा कैलाली, जुलाघाट नाका बैतडी, पुलघाट नाका दार्चुला ओ जोलाजिमी नाका दार्चुलासे लौटुइया नेपालीके तथ्याङक धारजैटी रहल बा । सुदूरपश्चिम प्रदेशके उत्तर, दक्षिण ओ पश्चिम ओरसे खुला नाका हुइल ओरसे और नाकासे प्रवेश कैना नेपालीके तथ्याङक नइधारल हो ।
सामाजिक विकास मन्त्रालयसे डेहल जानकारी अनुसार कुवाँर ७ गते टमान नाका हुइटी १४ सय ५४ जाने, ८ गते ८ सय ८७ जाने, ९ गते १२ सय ३५ जाने, १० गते १६ सय २२ जाने, ११ गते १५ सय ५० जाने, १२ गते २१ सय ८० जाने १३ गते ४ हजार ३ सय १२ जाने सिमानाका हुइटी नेपाल प्रवेश करले बटै ।
विफेक रोज गौरीफन्टा कैलालीसे ३ हजार ५ सय ५४ जाने, गडडाचौकी भन्सार कञ्चनपुरसे ७ सय ९ जाने, जुलाघाट नाका बैतडीसे ४० जाने ओ पुलघाट नाका दार्चुलासे ९ जाने नेपाल लौटल बटै ।
नेपालीहुक्रे खेतीपाटी सेक्के मौसमी रुपमे रोजगारीके लाग भारतमे जैना करल बटै । कलेसे टिहुवार आइलसंगे चाडपर्व मनाइ घर लौटना करल बटै ।
–
–
