बर्दिया क्षेत्र नम्बर २ से रेशम चौधरीके बाबा लालवीर विजयी
पहुरा समाचारदाता
बर्दिया, ७ अगहन । बर्दिया क्षेत्र नम्बर २ मे प्रतिनिधि सभा सदस्यमे स्वतन्त्र (चापकल नल्का) से लालवीर चौधरी विजयी हुइल बाटै । गठबन्धनसे माओवादीके सुरेश पन्थहे १३६ मतसे पाछे परटी स्वतन्त्र उम्मेदवार चौधरी विजयी हुइल हुइट ।
स्वतन्त्रसे चुनाव चिन्ह (चापाकल नल्का) के लालवीर चौधरी २६ हजार ५२० मत प्राप्त करले बाटै कलेसे ओहकान निकटतम प्रतिद्वन्द्वी गठबन्धनसे माओवादीके सुरेश पन्थ २६ हजार ३८४ मत पैले बाटै ।
ओस्टके नेकपा एमालेके पंकजसिँह राठौर १६ हजार ९० मत प्राप्त करले बाटै कलेसे राप्रपाके विनय रावल १३ हजार २ सय ९२ मत प्राप्त करले बाटै । विजयी चौधरी रेशम चौधरीके बाबा हुइट । रेशमके उम्मेदवारी खारेजी हुइलपाछे नागरिक उन्मुक्ति पार्टीसे स्वतन्त्रमे उम्मेदवारी डेहल चौधरीहे सहयोग करल हो ।
जेल जीवन बिटैटी रहल रेशम चौधरी नागरिक उन्मुक्ति पार्टीसे उम्मेदवारी डेलेसे फेन उम्मेदवारी खारेज हुइ सेक्ना सम्भावनाहे मध्यनजर कैटी आपन बाबा लालवीर चौधरीहे स्वतन्त्रसे उम्मेदवारी दर्ता कराइल रहिट ।
रेशम चौधरीके उम्मेदवारी खारेज हुइलपाछे नागरिक उन्मुक्ति पार्टी (ढकिया) स्वतन्त्र उम्मेदवार चौधरीके चिन्ह (चापाकल नल्का) हे समर्थन करल रहे ।
बर्दिया क्षेत्र नम्बर २ मे १ लाख ५२ हजार ६२ मतदाता रहलमे ९२ हजार ४१९ मत गिरल रहे ।
–
–
