कैलालीमे हालसम ४३८ एचआइभी संक्रमितके मृत्यु

पहुरा समाचारदाता
धनगढी, १५ अगहन । कैलाली जिल्लामे हालसम ४ सय ३८ जाने एचआइझी एडस संक्रमितहुकनके मृत्यु हुसेकल स्वास्थ्य कार्यालय कैलाली जनैले बा ।

३५औं विश्व एडस दिवसके अवसरमे बुधके रोज धनगढीमे आयोजित एक कार्यक्रममे स्वास्थ्य कार्यालयके टिभि/एचआइभी फोकल पर्सन देवदत्त जोशी उ जानकारी डेहल रहिट । कैलाली जिल्लामे हालसम ३०२ महिला, १३५ जाने पुरुष ओ एक जाने यौनिक तथा लैङिक अल्पसंख्यक सख्यासे करके ४ सय ३८ जाने एचआइभी एडस संक्रमितहुकनके मृत्यु हुसेकल उहाँ जनैलै । गैल आर्थिक बर्ष २०७८/०७९ सालमे कैलालीमे ३८ जाने एचआइभी एडस संक्रमितहुकनके मृत्यु हुइल बा ।

कैलाली जिल्लामे अब्बे १ हजार ६३४ जाने एआरटी केन्द्रसे उपचार करैटी रहल बटै । जेम्ने ८ सय ५३ जाने महिला, ६ सय ७४ जाने पुरुष, ३४ जाने यौनिक तथा लैङिक अल्पसंख्यक समुदाय ओ ७३ जाने बालबालिका रहल बटै । एआरटी केन्द्रके सेती प्रादेशिक अस्पताल, मालाखेती अस्पताल, टीकापुर अस्पतालमे तोकल बा । सेती प्रादेशिक अस्पतालसे ४ सय ९८ जाने महिला, ४ सय १२ पुरुष, ३१ जाने यौनिक तथा लैङिक अल्पसंख्यक समुदाय ओ ४८ जाने बालबालिका बटै । मालाखेती अस्पताल ४९ जाने महिला, ८८ पुरुष बटै । टीकापुर अस्पतालसे उपचार करुइयामे ३ सय ६ जाने महिला, २ सय १४ पुरुष, ३ जाने यौनिक तथा लैङिक अल्पसंख्यक समुदाय ओ २५ जाने बालबालिका बटै ।

कैलाली जिल्लामे आर्थिक बर्ष २०७८/०७९ सालमे १ सय ५३ जाने एचआइभी संक्रमितके संख्या दर्ता हुइल रहे । जेम्ने पुरुष ७९ जाने, महिला ५९ जाने, यौनिक तथा लैङिक अल्पसंख्यक समुदायके ७ जाने ओ बालबालिका ८ जाने रहल स्वास्थ्य कार्यालय कैलाली जनैले बा । गैल आर्थिक बर्ष २०७८/०८९ सालमे सुदूरपश्चिम प्रदेशके नौ जिल्लामे गर्भवती डाईहुकनके एआइभी जाँच करेबेर ठप तीन जाने लौवा संक्रमित भेटल रहिट । जेम्ने कैलालीके २ जाने ओ बैतडीके एक जाने रहल बटै ।

सुदूरपश्चिम प्रदेशके नौ जिल्लामे आर्थिक बर्ष २०७८/०७९ सालमे ३ हजार ५६३ जाने एचआइभी संक्रमित एआरटी उपचार सेवा लेटी रहल बटै । जेम्ने कैलालीके सबसे ढेर १६ सय ३४ जाने, कञ्चनपुरमे ३९२, डोटी ४९३, दार्चुला ४२, डडेल्धुरा ११२, बाजुरा ५९, बझाङ ८७, बैतडी १०९ ओ अछाम ६३५ जाने रहल बटै ।

नेपाल सरकार राष्ट्रिय एचआइभी कार्यक्रमके भविष्यके प्राथमिकतामे सन २०३० सम एडसके महामारीहे अन्त्य कैना, शुन्य नयाँ एचआइभी संक्रमण, शुन्य एडस सम्बन्धी मृत्यु, शुन्य एडस सम्बन्धी भेडभाव कैना लक्ष्य लेले बा ।

ओस्टेक करके एचआइभी डाईसे बच्चामे हुइना संक्रमण उन्मुलन कैना लक्ष्यफे रहल बा । नेपालमे सन २०२१ के अन्तसम ३० हजार व्यक्तिमे एचआइभी संक्रमण रहल अनुमन करल बा ।