वार्षिकोत्सवके अवसरमे नि:शुल्क दाँत शिविर

पहुरा समाचारदाता
धनगढी, १४ अगहन । हिमालयन गौरीशंकर डेण्टल क्लिनिकसे १३औं वार्षिकोत्सवके अवसरमे हसुलियामे शाखा कार्यालय उदघाटन करटी शुकके रोजके एक दिने निःशुल्क डेण्टल शिविर सञ्चालन करले बा ।

कैलारी गाउँपालिकाके अध्यक्ष राजसमझ चौधरी एक कार्यक्रमके विच उ डेण्टल क्लिनिकके नयाँ शाखा तथा निःशुल्क दाँत शिविरके उदघाटन करले बटै । गाउँपालिकामे निशुल्क दाँत शिविर संचालन कैडेलकमे उहाँ धन्यवाद ज्ञापन करल रहिट । उहाँ कहलै, ‘निशुल्क दाँत शिविर संचालनसे आर्थिक अभाव रहल व्यक्ति उपचार कैना मौका पैलै ।’

डेण्टलके प्रवन्ध निर्देशक रत्न एसके वार्षिकोत्सव तथा कैलारी गाउँपालिका–१, हसुलिया बजारमे शाखा विस्तारके क्रममे एक दिने निःशुल्क डेण्टल शिविर आयोजना करल बटैलै । डेण्डल शिविरमे विडिएस करल दन्त चिकित्सकसे निःशुल्क चेकजाँच तथा औषधी उपचार समेत हुइना प्रवन्ध निर्देशक एसके बटैलै । इहीसे आघे सामान्य दाँतके किल उपचार कैटी आइल क्लिनिकके आब धनगढीस्थित प्रधान कार्यालयसे आब अप्रेसन सहितके सेवा सुरु करल उहाँ बटैलै ।

क्लिनिकसे विडिएस करल दन्त चिकित्सक विडीएस डा. सुमन कार्की, एमडीएस डा. मनोज खड्का,एमडिएस डा. विजय कार्की, विडीएस डा. सुस्मिता महरा सहित १४ जाने अन्य स्वास्थ्यकर्मीनके सहयोगसे दन्त सेवा डेटी रहल क्लिनिक प्रवन्ध निर्देशक एसके बटैलै ।

अपने यिहे क्षेत्रसे ढेर चिरपरिचित हुइल ओरसे समाजसेवाके लाग एक दिने निशुल्क दाँत शिविरके आयोजना करके दाँतके टमान समस्याके दवाई सहित निशुल्क उपचार कैगिल प्रवन्ध निर्देशक एसके बटैलै । शिविरमे २ सय ५० जाने सेवा लेले बटै ।

१३औं वार्षिकोत्सवके अवसरमे हसुलियामे शाखा कार्यालय उदघाटन तथा निःशुल्क डेण्टल शिविरमे गाउँपालिका उपाध्यक्ष भगवतीकुमारी चौधरी, नेपाली काँग्रेस कैलारी गाउँपालिका सभापति कृष्णप्रसाद चौधरी, नेपाली काँग्रेसके यूवा नेता अविनाश चौधरी, वडा सदस्यहुकनके सहभागिता रहल रहे ।