पलेटीके ४औं श्रृङखलामे झुम्लैं साहित्यकार
पहुरा समाचारदाता
धनगढी, १७ अगहन । पलेटीके ४औं साहित्यिक श्रृङखला सनिच्चरके रोज धनगढीमे निप्टल बा ।
धनगढी २ सन्तोषी टोलमे घर रहल साहित्यकार हेमन्ती जोशीके घरमे जम्मा होके सहभागी हुइल सक्कु साहित्यकार अपन अपन रचना सुनैले रहिंट । लग्टार हुइना पलेटी साहित्यिक रचना वाचन कार्यक्रम कोरोनाके माहोल बर्हल ओरसे बीचमे रुकल रहे ।
पलेटी लग्टार रचना बाचनमे बरिस्ठ साहित्यकार, श्रेष्ठ प्रिय पत्थर, फाल्गुना दाहाल, हेमन्ती जोशी, पुष्करराज भट्ट, तारा पल्लबी, रघुनाथ कडरिया, उषा जोशी, लक्ष्मीप्रसाद पौडेल, सागर कुस्मी, तुल्सी शर्मा, कोपिला शर्मा लगायत साहित्यकार ओइने अपन गजल, मुक्तक, कविता, लघुकथा वाचन कैले रहिंट ।
ओस्टेके लावा लावा साहित्यकार कुश्मा भट्ट, समीर ओझा, कैलाश बोगटी, अबि प्यारे, मनोज बम, सन्जीप चौधरी ञडुखियारीझ, सुनिल खड्का लगायत फेन अपन अपन समसमायिक रचना बाचन कैले रहिंट ।
लघुकथामे पीएचडी करल साहित्यकार पुष्करराज भट्ट गजल, मुक्तक, कविता किल नाही आबसे लघुकथा विधामे कलम चलाइ पर्ना बटैलैं । रचना सुनके आब युबा पिढिनके रचना परिस्कृत हुइल उहाँ कहाइ बा ।
समय सान्दर्भिक ओ देशके परिस्थिति अनुसार सक्कुहुनके रचना सुनके श्रेष्ठ प्रिया पत्थर सक्कु जहन धन्यवाद फेन डेलैं । ओ अइना दिनमे आउर मजा मजा रचना रछे पर्ना लावा साहित्यकार ओइन सुझाव फेन डेलैं ।
अइना दिनमे समय ठिकठिके रहि कलेसे फरक फरक ठाउँ कैके लग्टार साहित्यिक रचना वाचन कर्टी जैना पकेटी कार्यक्रम सहजकर्ता साहित्यकार हेमन्ती जोशी बटैलैं ।
