माघ ४ गतेसे टीकापुर महोत्सव
पहुरा समाचारदाता
टीकापुर, १८ अगहन । टीकापुर उद्योग वाणिज्य संघसे इ बरस टीकापुर महोत्सव २०७९ के आयोजना कैना हुइल बा ।
संघसे अँट्वारके पत्रकार सम्मेलन मार्फत महोत्सव आयोजना कैना जनाइल हो । महोत्सव माघ ४ गतेसे १५ गतेसम सञ्चालन हुइना जानकारी कराइल बा । संघसे महोत्सव सफलतापूर्वक सम्पन्न करक लाग मूल समारोह समिति ओ टमान उपसमिति समेत गठन करले बा ।
संघके अध्यक्ष चक्रपाणी सापकोटाके संयोजकत्वमे मूल समारोह समिति गठन करल बा । मूल समारोह समितिमे संघके पदाधिकारी सदस्य रहल बाटै । ओस्टके निवर्तमान अध्यक्ष रामबहादुर भण्डारीहे महोत्सव व्यवस्थापक चयन करल बा ।
महोत्सव सम्पन्नके लाग १५ ठो उपसमिति समेत गठन करल मूल समारोह समितिके संयोजक सापकोटा जानकारी डेलै । जौन अनुसार पहुना सत्कारमे उपाध्यक्ष सन्तोष खड्का, आर्थिकमे उपाध्यक्ष कृष्ण उपाध्याय बजगाई, साँस्कृतिकमे सचिव तपेन्द्र कुँवर ओ छपाईमे कोषाध्यक्ष लोकेश साउँद संयोजक रहल बाटै ।
अन्य समितिके संयोजक ओर सूचना तथा सञ्चारमे प्रकाश उपाध्याय, मञ्च व्यवस्थापनमे पृथ्वीराज ढुंगाना, स्टलमे बमबहादुर ओली, पार्किङ तथा सुरक्षामे नमराज देवकोटा, यातायातमे दुर्गा साहु, ब्यानरमे हेमन्त रावल रहल बाटै ।
ओस्टके रमाईलो मेलामे हंशराज रावल, सूचना तथा प्रविधिमे लालबहादुर चौधरी, कृषिमे टीका शाही, परिसरमे जीतबहादुर चौधरी ओ प्राथमिक उपचारमे माया बागदास संयोजक रहल बाटै ।
मूल समारोह समितिके संयोजक सापकोटा महोत्सव सफल पारक लाग सक्कु जनहनहे सेक्नासम सहयोगके लाग आग्रह करले बाटै । विगत दुई बरस कोरोनाके कारण महोत्सव हुइ सेकल नैरहे । इ बरस महोत्सवमे स्थानीयके समेत सकृय सहभागिता रहना संघसे विश्वास करले बा ।
संघसे महोत्सवसे क्षेत्रके ब्यापार व्यवसायमे टेवा पुग्नाके साथे कला संस्कृतिके समेत प्रचारप्रसार हुइना बटाइल बा । महोत्सवमे स्थानीय ओ राष्ट्रिय कलाकारके प्रस्तुती समेत रहना बा ।
संघसे महोत्सवमे करिव २५० स्टल रहना जनाइल बा । उ स्टल बुकिङके लाग खुल्ला करल समेत संघ जानकारी डेले बा ।
