थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १६ चैत २६४७, शुक्कर ]
[ वि.सं १६ चैत्र २०८०, शुक्रबार ]
[ 29 Mar 2024, Friday ]
‘ १९औ महिला स्वास्थ्य स्वयसेविका दिवस २०७९ ’

महिला स्वास्थ्य स्वयसेविका झोला ओ सम्मानपत्र वितरण

पहुरा | १९ मंसिर २०७९, सोमबार
महिला स्वास्थ्य स्वयसेविका झोला ओ सम्मानपत्र वितरण

पहुरा समाचारदाता
हसुलिया, १९ अगहन ।
१९औ महिला स्वास्थ्य स्वयसेविका दिवस २०७९ के अवसरमे कैलारी गाउँपालिकासे महिला स्वास्थ्य स्वयसेविका कोसेली स्वरुप १ थान लोगो सहिटके झोला ओ सम्मानपत्र वितरण करले बा ।

कैलारी गाउँपालिका अध्यक्ष राजसमझ चौधरीके प्रमुख आतिथ्यता ओ गाउँपालिकाके उपाध्यक्ष भगवतीकुमारी चौधरीके विशिष्ट आतिथ्यतामे वडा नम्बर ८ मे हुइल कार्यक्रममे गाउँपालिकाभिटर कार्यरत रहल १ सय २५ जाने महिला स्वास्थ्य स्वयसेविकाहुकनहे कोसेली स्वरुप १ थान लोगो सहिटके झोला ओ सम्मानपत्र वितरण करल स्वास्थ्य शाखा प्रमुख नरेश चौधरी बटैलै ।

कार्यक्रममे बोल्टी गाउँपालिका अध्यक्ष राजसमझ चौधरी महिला स्वास्थ्य स्वयं सेविका स्वास्थ्य क्षेत्रके जग रहल बटैलै । उहाँहुक्रे विना तलब गाउँघरमे निस्वार्थ भावनासे दिनरात नइकहिके सेवा डेटी रहलफे उहाँ बटैलै ।
वडका पहुना अध्यक्ष कहलै, महिला स्वास्थ्य स्वयं सेविका जीवनभर निशुल्क सेवा डेना मने अवकास पाई खाली हात जैना ओरसे पालिकासे आब अवकास हुइल महिला स्वास्थ्य स्वयं सेविकाहुकनहे एक लाख नगद रुप्या सहिट विदाई कैना निर्णय हुइल बा ।’

गाउँपालिका उपाध्यक्ष भगवतीकुमारी चौधरी १९औ महिला स्वास्थ्य स्वयसेविका दिवसके शुभकामना डेटी उहाँहुकनके कामके सम्मान कैना जरुरी रहल बटैली । उहाँ कहली, ‘और कर्मचारी महिनाभर काम करेबेर तलब पैना मने, महिला स्वास्थ्य स्वयं सेविका विना तलब काम करे पर्ना बाध्यता रहल बा । यकर लाग सरकार सोचे पर्ना हो ।’ गाउँपालिकासे महिला स्वास्थ्य स्वय सेविकाहुकन संंचार खर्च डेना निर्णयफे हुइल उपाध्यक्ष बटैली ।

कैलारी गाउँपालिका वडा नम्बर ८ के वडा अध्यक्ष तारामल कठरियाके अध्यक्षतामे हुइल कार्यक्रममे वडा सदस्य, महिला स्वास्थ्य स्वयं सेविका, स्वास्थ्य शाखाके कर्मचारीहुकनके सहभागिता रहे । ओस्टेक उदासीपुर प्राथमिक स्वास्थ्य केन्द्रके अनुगमन कैगिल बा ।

जनाअवजको टिप्पणीहरू