थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]
‘ सुदूरपश्चिम महोत्सव सुरु ’

पश्चिम सेती ओ पञ्चेश्वर हाली बनीः प्रम देउवा

पहुरा | २२ मंसिर २०७९, बिहीबार
पश्चिम सेती ओ पञ्चेश्वर हाली बनीः प्रम देउवा

पहुरा समाचारदाता
धनगढी, २२ अगहन ।
प्रधानमन्त्री शेरबहादुर देउवा पश्चिम सेती ओ पञ्चेश्वर परियोजना हाली बन्ना बटैले बाटै ।

कैलाली उद्योग वाणिज्य संघसे आयोजित सुदूरपश्चिम महोत्सवके उद्घाटन कैटी प्रधानमन्त्री देउवा पश्चिम सेती ओ पञ्चेश्वर लगायत प्रदेशके बरवार राष्ट्रिय गौरवके योजनाहे सरकारसे प्राथमिकतामा राखल बटाइल हुइट ।

पञ्चेश्वर परियोजनाके लाग भारतके प्रधानमन्त्री फेन चासो डेहल ओ पश्चिम सेतीके फेन भारतीय कम्पनी लाइसेन्स लेहल उहाँ बटैलै ।

‘पश्चिम सेती परियोजना निर्माणके लाग भारतीय कम्पनी लाइसेन्स लेसेकल बा, आब उक्त परियोजना हाली पुरा होके सुदूरपश्चिम प्रदेश समृद्ध हुइना विश्वास लेले बाटुँ’, उहाँ कहलै ।

उहाँ इ क्षेत्रके विकासके लाग रानी जमरा सिचाई आयोजना, चमेलिया जलविद्युत आयोजना, दोधरा–चादनी सुख्खा बन्दरगाह निर्माणके कामहे फेन सरकारसे प्राथमिकता डेहल बटैलै ।

उहाा सुदूरपश्चिमके मुख्य ब्यपारिक क्षेत्र धनगढीमे हुइल महोत्सवसे इ क्षेत्रमे उत्पादन हुइल बस्तुके बजारीकरणमे मद्दत फेन पुग्ना बटैलै । उहाँ यहाँके कृषि तथा पर्यटकीय क्षेत्रके विकास करे सेक्लेसे प्रदेश विकासमे फड्को मर्ना फेन बटाइल रहिट । उहाँ सुदूरपश्चिम प्रदेश पर्यटकीय सम्भावना बोकल क्षेत्र फेन बटाइल रहिट ।

उहे अवसरमे प्रधानमन्त्री देउवाहे कैलाली उद्योग बाणिज्य संघके अध्यक्ष पुष्पराज कुवँर १५ बुँदे माग सहित १५ किलोके माला लगाइल रहिट । २१ बुँदा सहितके माग रख्टी सुरु हुइल महोत्सव कुछ माग पुरा होसेकल ओरसे मालाके तौल फेन घटाइल जनाइल बा ।

महोत्सव सुरुवातसे नै संघसे धनगढी अन्तर्राष्ट्रिय स्तरके क्षेत्रीय विमानस्थल, गेटा मेडिकल कलेज, पश्चिम सेती जलविद्युत आयोजना, औद्योगिक करिडोर, विशेष आर्थिक क्षेत्र, गौरीफन्टा सीमानाके स्तरोन्नती, धनगढी–दिपायल–बझाङ द्रुतमार्ग, सुख्खा बन्दरगाह, प्राविधिक कलेज, प्रदर्शनीस्थल, सितगृह, लगायतके प्रमुख माग रख्टी आइल बा ।

२०६३ सालसे महोत्सव सञ्चालन हुइटी आइलमे संघसे आघेक दुई बरस कोरोना महामारीके कारण महोत्सव आयोजना हुइ नैसेकल रहे । महोत्सवके इ १६ औं संस्करण हो ।

महोत्सवके पूर्व सन्ध्यामे बिफेक सकारे धनगढी चौराहसे महोत्सव स्थलसम बाजागाजा सहित प्रभात फेरीके आयोजना करल रहे ।

महोत्सवमे कृषि उपजके ११, होटलके २६, अटोमोवाइलके ११ तथा बैंक ओ वित्तीय संस्था, घरेलु उद्यम एवं व्यापारिक सहित चार सय ढेर स्टल रहल बावै ।

पुस २ गतेसम सञ्चालन हुइना महोत्सवसे सुदूरपश्चिमके आर्थिक विकासके लाग सम्भावनाके खोजी कैटी इ क्षेत्रके पर्यटन विकास, कला संस्कृति, खानपान, भाषाके संरक्षणसहित व्यवसायिक रुपमे सफलता प्राप्त कैके जनताके गुणस्तरीय जीवनमे सहयोगी भूमिका खेल्ना विश्वास लेहल बा ।

जनाअवजको टिप्पणीहरू