थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

धनगढीमे ‘नमस्ते मेयर जनगुनासो सुनवाइ’ सेवा सञ्चालन

पहुरा | २३ मंसिर २०७९, शुक्रबार
धनगढीमे ‘नमस्ते मेयर जनगुनासो सुनवाइ’ सेवा सञ्चालन

पहुरा समाचारदाता
धनगढी, २३ अगहन ।
भ्रष्टाचार न्यूनीकरण कैटी सुशासन प्रवर्द्धनके लाग धनगढी उपमहानगरपालिकासे नमस्ते मेयर जनगुनासो सुनवाइ सेवा सञ्चालनमे लानल बा ।

अन्तर्राष्ट्रिय भ्रष्टाचारविरुद्धके दिवसके अवसर पारके यूएनडीपीके सहयोगमे उपमहानगरपालिकासे शुकसे नमस्ते मेयर जनगुनासो सुनवाइ सेवा सञ्चालनमे लानल हो ।

धनगढीके मेयर गोपाल हमाल, कैलालीके प्रमुख जिल्ला अधिकारी किरण थापा ओ शिक्षाविद् तथा प्राध्यापक डा. हेमराज पन्त संयुक्त रुपमे सुशासन प्रवर्द्धन कैना उद्देश्यसे नमस्ते मेयर जनगुनासो सुनवाइ सेवाके शुभारम्भ करल हुइट । यूएनडीपीके संस्थागत सुधारमार्फत न्यायमे पहुँच अभिवृद्धि परियोजनाके परियोजना अधिकृत मनोज ओझा स्थानीय तहमे देशमे पहिल पटक धनगढी उपमहानगरपालिकामे नमस्ते मेयर जनगुनासो सुनवाइ सेवा सञ्चालनमे आइल बटैलै ।

ओहकान अनुसार उक्त सेवा अन्तरगत सेवाग्राही क्युआर कोड स्क्यान कैके फेसबुक, ट्वीटर, इन्स्टाग्राम, वाट्स एप मार्फत फेन गुनासा तथा सुझाव टिपाइ सेकजैना व्यवस्था मिलाइल बा । गुनासा तथा सुझाव संकलनके लाग यूएनडीपीके सहयोगमे उपमहानगरपालिकासे छुट्टे जनगुनासो इकाइ फेन बनैले बा । जनगुनासाके लाग १६६०९१५२७७७ के टोल फ्री नम्बर फेन राखल बा ।

नमस्ते मेयर जनगुनासो सुनवाइ सेवा शुभारम्भ कैटी धनगढीके मेयर गोपाल हमाल धनगढीहे भ्रष्टाचारमुक्त उपमहानगरपालिका बनाइक लाग सक्कु जनहनके सहयोग आवश्यक रहल बटैलै ।

उहाँ उपमहानगरपालिकासे प्रवाह हुइना सेवासुविधाहे छिटोछरितो प्रवाह कैटी भ्रष्टाचारमुक्त नगर बनैना चाहानामे सक्कु जाने साथ डेनामे फेन विश्वस्त रहल बटैलै ।

‘सफा पानी आइक लाग मूल सफा हुइ परठ् । जौन मूल नै फोहर बा वहाँसे सफा पानी नैआइठ् । यहाँ मूल कहलक राजनीतिक नेतृत्व हो । नेतृत्व इमादानर नैहो कलेसे भ्रष्टाचार मुक्तके कल्पना करे नैसेकजाइ,’ हमाल कहलै, ‘मेयर भ्रष्टाचारी हइ नैपरल । मै धनगढी उपमहानगरपालिकाहे छिटोछरितो सेवा प्रवाह कैटी भ्रष्टाचार मुक्त नगर बनैना अठोट लेले बाटुँ । सबके सहयोग आवश्यक बा ।’

नमस्ते मेयर जनगुनासो सुनवाइ सेवामार्फत सर्वसाधारणसे टिपाजैना गुनासा सकभर छिटोछरितो सम्बोधन कैना व्यवस्था मिलाइल उपमहानगरपालिका जनैले बा । जनगुनासो सुनवाइ सेवा शुभारम्भ कैनासे पहिले धनगढी चौराहसे उपमहानगरपालिका परिसरसम भ्रष्टाचारविरुद्ध ¥याली समेत निकारगैल रहे ।

जनाअवजको टिप्पणीहरू