लैङ्गिग हिंसा विरुद्धके १६ दिने अभियान सम्पन्न
पहुरा समाचारदाता
हसुलिया, २५ अगहन । कैलालीके कैलारी गाउँपालिकामे लैङ्गिग हिंसा विरुद्धके १६ दिने अभियान विविध कार्यक्रम सहित शनिच्चरके सम्पन्न हुइल बा ।
अभियान अर्न्तगत गाउँपालिकाके प्रत्येक वडामे टमान कार्यक्रम आयोजना कैके मनाइल गाउँपालिकाके महिला तथा बालबालिका शाखा प्रमुख बालकुमारी चौधरी जानकारी डेली । गाउँपालिकाके ९ वडामे नेतृत्व विकास सम्बन्धि अभिमुखीकरण, समाजमे रहल कुरीतिजन्य परम्परा विरुद्धके अभिमुखिकरण तथा सचेतनामुलक र्याली, बालविवाह तथा बहुविवाह न्युनीकरण सम्बन्धि कार्यक्रम आयोजना कैके मनाइल शाखा प्रमुख चौधरी बटैली ।
कैलारी गाउँपालिका वडा नम्बर ३ के वडा अध्यक्ष तथा सामाजिक विकास समिति संयोजक सन्तराम चौधरीके अध्यक्षतामे कार्यक्रम समापन हुइल रहे । कार्यक्रममे वडा नम्बर ४ के वडा अध्यक्ष ठागुराम चौधरी, कार्यपालिका सदस्य, महिला ओ दलित सदस्य, सरकारी तथा गैरसरकारी संघ सस्थाके पदाधिकारी लगायतके सहभागिता रहल रहे ।
उहे अवसरमे महिलाहुक्रनके लाग म्युजिकल चियर प्रतियोगिता फेन आयोजना करल रहे । प्रतियोगितामे जब्दहुवाके लहानी चौधरी प्रथम, इलाका प्रहरी कार्यालय हसुलियाके नेपाल प्रहरी जवान नविना महरा द्धितीय ओ मनाउके गीता चौधरी तृतीय हुइल रही ।
कैलारी गाउँपालिका महिला तथा बालबालिका शाखाके आयोजना तथा गाउँपालिका अर्न्तगतके क्रियाशिल संघसस्था चेतनशील महिला विकास बहुउद्देश्यीय सहकारी संस्था, पारदर्शी महिला विकास सहकारी संस्था, टीपीओ नेपाल, सामाजिक सेवा अध्ययन केन्द्र, महिला पुनःस्थापना गृह, दलित महिला अधिकार मञ्च, महिला सञ्जाल, इन्सेक, नेपाल प्रहरी ओ पिसविन कैलालीके समन्वयमे कार्यक्रम हुइल रहे ।
