खाद्य अधिकारके क्षेत्रमे ढेर काम करे पर्ना बाः पाठक
पहुरा समाचारदाता
धनगढी, ९ पुस । सुदूरपश्चिम प्रदेशके प्रदेश सभा सदस्य धर्मराज पाठक खाद्य अधिकारके क्षेत्रमे आभिन ढेर काम करे पर्ना बटैले बाटै ।
शनिच्चरके रोज धनगढीमे परिवर्तनके लाग कार्यरत युवा समूह नेपाल (याक नेपाल) के १८ औं वार्षिक साधारण सभा तथा सार्वजनिक सुनुवाई कार्यक्रमहे सम्बोधन कैटी प्रदेश सभा सदस्य पाठक ओइसीन बटाइल हुइट । सुदूरपश्मि प्रदेश खाद्य अधिकारके क्षेत्रओर पाछे परल ओरसे उ क्षेत्रमे आभिन आवश्यक काम करे पर्ना उहाँ बटाइल हुइट ।
‘सुदूरपश्चिम प्रदेशक अन्य प्रदेशके तुलनामे आभिन फेन खाद्य अधिकारके दृष्टिकोणसे पाछे परल बा’, उहाँ कहलै– ‘प्रदेशमे रहल गरिव, विपन्न, पिछरल, मुक्त कमैया, दलित, हरुवा चरुवा लगायतके समुदायके लाथ खाद्य अधिकार सुनिश्चिता तथा पहुँचके लाग आभिन फेन ढेर काम करे पर्ना रहल बावै ।’
याक नेपाल खाद्य अधिकार सम्बन्धी प्रदेशमे खाद्य अधिकार सवलीकरण परियोजना सञ्चालन करले बा । जौन कार्य एकदमै महत्वपूर्ण रहल बटैटी प्रदेश सभा सदस्य पाठक याक नेपालहे धन्यवाद फेन डेहल रहिट ।
कार्यक्रमके बर्का पहुना समेत रहल प्रदेश सभा सदस्य पाठक सामाजिक, सांस्कृतिक तथा आर्थिक दृष्टिकोणसे जोखिममे रहल समुदायके अधिकार सुनिश्चिताके लाग फेन जोड डेहल रहिट । कलेसे उहाँ मुक्त कमैया, दलित, विपन्न समुदाय आभिन फेन शिक्षा, स्वास्थ्य, रोजगारीके पहुँचसे डुर रहल बटैटी उ क्षेत्रमे फेन आवश्कय काम करे पर्ना बटाइल रहिट ।
‘आभिन फेन मुक्त कमैया, दलित विपन्न समुदाय शिक्षा, स्वास्थ्य, रोजगारीके पहुँचसे डुर रहल अवस्था रहल बावै’, उहाँ कहलै–‘समुदायके आर्थिक सशक्तिकरणके लाग शिक्षा, स्वास्थ्य क्षेत्रमे लगानी ओ उद्यमशीलता मार्फत रोजगारी सृजनाके लाग सरकारी तथा गैर सरकारी संघसस्था काम करे पर्ना रहल बा ।’
कार्यक्रममे सामाजिक विकास मन्त्रालयके उपसचिव गणेश बहादुर सिंह समाजके विपन्न, गरिव, पिछरल समुदायके हक अधिकार सुनिश्चिताके लाग गैरसरकारी संघसंस्थासे समन्वय सहकार्य कैके आघे बह्रे पर्ना बटाइल रहिट ।
गैरसरकारी संस्था महासंघके उपाध्यक्ष तेनमान साउद याक नेपाल खाद्य अधिकार, पोषणके क्षेत्रमे महत्वपूर्ण भूमिका खेलल् बटाइल रहिट । उहाँ आभिन फेन प्रदेशमे गरिवी, भोकमरीके विकराल समस्या रहल औंल्याइटी उहाँ उ क्षेत्रमे फेन काम करे पर्ना आवश्यक रहल बटाइल रहिट ।
कार्यक्रममे संस्थाके सहल्लाहकार सदस्य दीलबहादुर खाती, कानुनी सल्लाहकार तिलक बहादुर अधिकारी शुभकामना मनतब्य व्यक्त करल रहिट ।
कार्यक्रममे संस्थाके महासचिव हृदय पुजारा संस्थागत प्रस्तुतीकरण करल रहिट । कलेसे कोषाध्यक्ष संगीता अधिकारी आर्थिक वर्ष २०७८/०७९ के आर्थिक प्रतिवेदन प्रस्तुत करल रहिट । उहाँ आर्थिक वर्ष २०७८/०७९ के १ करोड ४० लाख १७ हजार ११४ रुप्या बराबरके आयव्यय प्रस्तुत करल रही ।
उहाँ संस्थासे सञ्चालित खाद्य अधिकार सवलीकरण परियोजना, परिवारिक खेती सवलीकरण/कोभिड १९से प्रभावितहुक्रनके लाग जिविकोपार्जन सुधार परियोजना लगायतके कार्यक्रममे उ खर्च हुइल बटाइल रही ।
ओस्टके उहाँ आर्थिक वर्ष २०७९/०८० के १ करोड ९२ लाख ८९ हजारके अनुमानित आयव्यय फेन प्रस्तुत करल रही ।
ओहे कार्यक्रममे संस्थाके कार्यकारी निर्देशक डबलबहादुर बम संस्थासे सञ्चालित टमान परियोजनाके बारेम जानकारी कराइल रहिट । कार्यक्रममे संस्थाके सचिव सत्यदेवी स्नेही स्वागत करल रही ।
‘बाचे पैना अधिकारके आधार, खाद्य अधिकार’ कना मूल नारा सहित याक नेपालसे सुदूरपश्मि प्रदेशके टमान जिल्ला तथा स्थानीय तहमे कार्यक्रम सञ्चालन करले बा ।
कलेसे कैलालीके धनगढी, गोदावरी, गौरीगंगा, घोडाघोडी, कैलारी लगायत स्थानीय तहमे संस्थासे विपन्न तथा सीमान्तकृत समुदायके सम्मानजनक जीवनयापन, सशक्तिकरणके माध्यमसे सीमान्तकृत समुदायके सरकारी तथा गैर सकारी सेवामे पहुँच अभिवृद्धि कैटी आइल बा ।
ओस्टके पाछे परल समुदाय विशेष कैके विपन्न, महिला, साना किसान, जनजाति, दलित, युवा तथा बालबालिकाहुक्रनके खाद्य, आवस, शिक्षा, स्वास्थ्य, वातावरणीय अधिकारके सुनिश्चितताके लाग श्रोत तथा सेवामे पहुँचके लाग काम कैटी आइल बा ।
