फुलवारीमे माघ १ गतेसे माघ मेला लग्ना
पहुरा समाचारदाता
धनगढी, १० पुस । “स्वास्थ्य संचार विकासके अभियान, कृषि संस्कृति ओ पयर्टन हमार पहिचान“ मूल नाराके साथ इ साल फेन थारु माघ मेला लग्ना हुइल बा । धनगढी १९ फुलवारी गाउँमे मेला लग्ना हुइल बा ।
पोरसाल जस्टे इ साल फेन थारू समुदायके लावा बरस माघके सुभ अवसरमे मेला लग्ना हुइल हो । मेलाके तयारीमे स्थानीय युवा हिरगरसे लागल बटैं ।
थारु संस्कृति टिहुवार मन्च फुलवारीके आयोजनामे फुलवारी आधारभुत विधालयाके अंगनामे मेला लग्ना मन्चके अध्यक्ष पर्बत चौधरी बटैलैं । मेला व्यवस्थापन समितिके अध्यक्ष पर्बत चौधरी ओ टमान उपसमिति बनाके मेलाके तयारी डटके हुइटी रहल जानकारी डेलैं ।
माघ १ गतेसे ६ गतेसम लग्ना उ मेलाके लाग मन्दिरके सरसफाईके काम संगे मन्दिरके रंगरोगन फेन हुइटी रहल जनागैल बा । मेलामे अउइया ओइनके सेवाहे मध्येनजर कैके मन्दिर परिसरमे खानेपानी नल्का बनैना काम फेन सुरु हुइल अध्यक्ष पर्बत जी बटैलैं ।
कैलाली जिल्लास्थित धार्मिक तिर्थस्थलमध्ये पुरन बाबा मन्दिरके महत्व फेन ढेर रहल स्थानीय लोगनके जनविश्वास बा । स्थानीयनके अन्सार मन्दिरमे माघ लहानके दिन दर्शनार्थीनके ढेर जमघट हुइटी आइल बा ।
अस्टे माघके आवसरमे हरेक साल जस्टे इ साल फेन भलिबल ओ ब्याटमिन्टन खेलके आयोजना कैगैल बा । इ खेल जुझिक झुझा हुइ । जौन टीमके जीत हुइ कलेसे उहिहे पुरस्कारके व्यवस्था रहल आयोजक जनैले बा ।
ओस्टेके मेलामे थारु कलाकार ओइनके जोरडार प्रस्तुति फेन रहि कलेसे स्थानीय नाचगान फेन गज्जब जोरसे हुइ । हरेक रोज फरक फरक गायक लोगनके गायन, नाच ओ पुरान सांस्कृतिक धमाका फेन रहि ।
आझ करिब ६० सालसे लग्टी आइल मेला हो । जहाँ हजारौं मनैंनके खचाखच भीर हुइल रहठ । नेपाल ओ उत्तर प्रदेश भारतके फेन बहुत दर्शक ओइने मेला अवलोकन ओ रमझम करे अइठैं ।
