स्थायी बन्ध्याकरण घुम्ती शिविरमे २२८ जाने सेवा लेलैं
पहुरा समाचारदाता
धनगढी,१२ पुस । स्वास्थ्य कार्यालय कैलालीके आयोजना तथा नेपाल परिवार संघसे सहकार्यमे हुइल स्थायी बन्ध्याकरण घुम्ती शिविरमे २२८ जाने सेवा लेले बटैं । कलेसे दुई जाने आंशिक अपाङता रहल व्यक्तिफे उ सेवा लेहल रहिट ।
गैल अगहन २२ गतेसे कैलालीके १२ स्थानीय तहमे सुरु परिवार नियोजन स्थायी बन्ध्याकरण घुम्ती शिविरमे २१३ महिलाके मिनिल्याप ओ १५ जाने पुरुषके भ्यासेक्टोमी सफलता पूर्वक सम्पन्न करल स्वास्थ्य कार्यालय कैलालीके परिवार नियोजन सुपर भाइजर निरिक्षक ओलट नारायण चापागाईं बटैलै ।
परिवार नियोजन स्थायी बन्ध्याकरण घुम्ती शिविर अन्र्तगत सहजपुर स्वास्थ्य चौकीमे १५ जाने मिनिल्याप, ७ जाने भ्यासेक्टोमी, मालाखेती अस्पतालमे २४ जाने मिनिल्याप, ३ जाने भ्यासेक्टोमी, चौमाला प्रा.स्वा.केन्द्रमे १० जाने मिनिल्याप, शहरी स्वास्थ्य केन्द्र चर्रामे ३३ जाने मिनिल्याप, जोशीपुर प्रा.स्वा.केन्द्रमे ४ जाने मिनिल्याप, अस्नेहरी शहरी स्वास्थ्य केन्द्रमे २४ जाने मिनिल्याप सेवा लेहल रहिट ।
ओस्टेक करके दुर्गौली स्वास्थ्य चौकी १७ जाने मिनिल्याप, ३ जाने भ्यासेक्टोमी, पिपरकोटि आधारभुत स्वास्थ केन्द्र लम्की चुहा न.पा.मे २० जाने मिनिल्याप, दोदोधरा अस्पतालमे २ जाने मिनिल्याप, दरख स्वास्थ्य चौकीमे २५ जाने मिनिल्याप, कैलारी गाउँपालिकाके हसुलिया स्वास्थ्य चौकीमे २१ मिनिल्याप, २ भ्यासेक्टोमी ओ उर्मा स्वास्थ्य चौकीमे १८ मिनिल्याप सेवा लेहल सुपर भाइजर निरिक्षक चापागाईं बटैलै ।
उ घुम्ती शिविरमे करिब ४ सय जानेक स्थायी बन्ध्याकरण कैना लक्ष्य रहल मने २२८ जाने सेवा लेहल नेपाल परिवार नियोजन संघ कैलाली शाखाके प्रमुख चेतराज फुलारा बटैलै । उहाँ कहलै, ‘अब्बे टमान मेरिक परिवार नियोजनके अस्थायी आसेकल ओरसे स्थायी बन्ध्याकरण करुइया घटल बटै । अभियानहे सफल बनैना सक्कु जनहनसे सहयोग हुइलेसे संख्या औरफे बह्राई सेक्जाइट ।’
ओस्टेक उ घुम्ती शिविरमे स्थायी बन्ध्याकरण सेवा लेहुइयाहुकनसे कैलारी गाउँपालिका, गोदावरी नगरपालिका, जानकी गाउँपालिका, भजनी नगरपालिका गरम कपरा डेहे सहयोग करल रहे । कैलारी गाउँपालिकासे ओइनहे यातायातफे डेके सहयोग करले रहिट । नेपाल परिवार नियोजन संघ कैलाली शाखाके प्रमुख चेतराज फुलाराके अनुसार कतिपय ठाउँमे स्थायी बन्ध्याकरण सेवा लेहुइयाहुकनहे जाउलो खवाके सहयोग कैगिल रहे ।
