३ सय ११ मानव अधिकार उल्लंघनके घटना अभिलेख
पहुरा समाचारदाता
धनगढी, १५ पुस । कैलालीमे मानव अधिकार उल्लंघनके घटना वृद्धि हुइल बा । विफेक रोज धनगढीमे अनौपचारिक क्षेत्र सेवा केन्द्र (इन्सेक)से ‘नेपाल मानव अधिकार वर्ष पुस्तक–२०२३’ प्रकाशन पूर्व वार्षिक समीक्षा कार्यक्रममे मानव अधिकार उल्लंघनके घटना वृद्धि हुइल तथ्यांक प्रस्तुत करल हो ।
इन्सेकमे २०२२ जनवरीसे डिसेम्बरसम ३ सय ११ मानव अधिकार उल्लंघनके घटना अभिलेख हुइल बा । उ घटनामे २ सय ९२ महिला ओ २२ पुरुष कैके ३ सय १४ जाने पीडित हुइल रहैं ।
इन्सेकमे गैल वर्ष ओहे अवधिके मानव अधिकार उल्लंघनके घटनामे २ सय २३ जाने पीडित हुइल रहैं । उमध्ये २ सय ११ महिला ओ १५ जाने पुरुष पीडित हुइल इन्सेकके सुदूरपश्चिम प्रदेश संयोजक खडकराज जोशी बटैलैं । उहाँ कलैं, “अइसिक हेरलेसे महिलाहुक्रे ढेर मानव अधिकार उल्लंघनके घटनामे परल बटैं ।”
उहाँक अनुसार यी वर्ष २ सय ९३ जाने महिला पीडित हुइल रहैं । उमध्ये घरेलु सिंहासे २ सय २४, बलात्कारसे १८ जाने, बलात्कार प्रयाससे एक जाने ओ बहुविवाहसे दुई जाने पीडित हुइल रहैं ।
ओस्टेक, मानव अधिकार उल्लंघनके घटनामे ४० जाने बालबालिका पीडित हुइल बटैं । उमध्ये बलात्कारसे २९, बेचबिखनमे ३, यौनदुर्व्यवहारसे ४, बलात्कार प्रयाससे ४, कथित बोक्सीके आरोपमे १ जाने पीडित हुइल बटैं । ओस्टेक, परिवारसे ३ जाने महिलाके हत्या ओ ३ जाने महिला घाहिल हुइल बटैं ।
यी अवधिमे अन्य पक्षसे ४ जाने ओ परिवारसे १ जाने पुरुषके हत्या, १२ जहनउपर कुटपिट, ३ जहनउपर दुर्व्यवहार हुइल इन्सेकके अभिलेखमे उल्लेख हुइल बा ।
–
–
