सुदूरपश्चिम प्रदेशसभा सदस्य लेलै शपथ
पहुरा समाचारदाता
धनगढी, १५ पुस । सुदूरपश्चिम प्रदेशसभा सदस्यहुक्रे पद तथा गोपनीयताके शपथ लेले बाटै । प्रदेशसभाके हलमे शुकके १ बजे प्रदेशसभाके ज्येष्ठ सदस्य मानबहादुर रावल शपथ कराइल हुइट । ज्येष्ठ सदस्यके रूपमे रावल शुकके प्रदेश प्रमुख देवराज जोशीसँग शपथ लेहल रहिट ।
रावल प्रदेश सभके अन्य ५२ सांसदहे शपथ कराइल हुइट । पद तथा गोपनीयताके शपथ लेहे टमान संस्कृति झल्कना पोसाकमे उपस्थित हुइल ४६ प्रदेश सभा सदस्य नेपाली भाषा ओ ६ जाने आपन मातृभाषामे शपथ लेहल रहिट । नागरिक उन्मुक्ति पार्टीके पाँच जाने ओ नेपाली कांग्रेसके समानुपातिक सांसद गीता चौधरी थारु भाषामे शपथ ग्रहण करल रहिट ।
५३ सदस्यीय सुदूरपश्चिम प्रदेशसभामे ३२ प्रत्यक्ष ओ २१ समानुपातिक निर्वाचन प्रणालीसे निर्वाचित हुइल बाटै । प्रदेशसभामे ६ दलके सहभागिता रहल बा । १९ सिट लानल नेपाली कांग्रेस प्रदेश संसद्मा सबसे बरवार दलके रूपमे रहल बा ।
ओस्टके, ११ सिट लानल माओवादी केन्द्र डुसरा स्थानमे रहल बा कलेसे १० सिट लानल एमाले टिसरा स्थानमे रहल बा ।
सुदूरपश्चिम प्रदेशसभामे चौथो दलके रूपमे नागरिक उन्मुक्ति पार्टी रहल बा । उक्त पार्टीके ७ जाने सांसद रहल बाटै । ४ जाने सांसद रहल एकीकृत समाजवादी पाँचौ स्थानमे रहल बा कलेसे प्रत्यक्ष ओर नैजिट्लेसे फेन समानुपातिकसे राप्रपाके एक जाने सांसद निर्वाचित हुइल बाटै । ओस्टके एक जाने स्वतन्त्र सांसद रहल बाटै ।
नागरिक उन्मुक्ति पार्टीबाहेक अन्य दलसे संसदीय दलके नेता चयन करल बाटै । नागरिक उन्मुक्तिसे रामेश्वर चौधरीहे संसदीय दलके नेतामे चयन करसेकल बा । नयाँ गठबन्धन बनलपाछे सरकारके नेतृत्वमे माओवादी केन्द्र, नागरिक उन्मुक्ति पार्टी ओ एमाले दाबी करटी रहल बावै ।
