अर्थतन्त्रमे सहकारीके महत्वपूर्ण भूमिका बाः मन्त्री सोडारी

पहुरा समाचारदाता
धनगढी,१५ पुस । सुदूरपश्चिम प्रदेशके भौतिक पूर्वाधार मन्त्री दीर्घ सोडारीे देशके अर्थतन्त्रमे सहकारीके महत्वपूर्ण भूमिका रहल बटैले बटै ।

हिमशिखर बहुद्देश्यीय सहकारी संस्था लिमिटेडके १४ औं बार्षिक साधारणसभाके उदघाटन करटी उहाँ सहकारिताके माध्ययमसे गरिबी निवारणमे महत्वपूर्ण योगदान पुग्टी आइल ओरसे देशके अर्थतन्त्रमे सहकारीके भूमिका महत्वपूर्ण रहल बटैलै ।

सहकारीसे बैंकके पहुँच बाहेर रहल निम्न ओ मध्ययमबर्गीयके उत्थानके लाग महत्वपूर्ण भूमिका खेलल मन्त्री सोडारी बटैलै । उहाँ शुरुमे हिमशिखर सहकारी २५ जाने ओ कुलपुँजी रु. २५ लाखसे संचालन करटी सदस्यहुकनके वित्तीय आवश्यकता पूरा कैना उत्कृष्ट सेवा प्रदान करटी आइलमे अब्बे तीन हजार ५९६ शेयर सदस्य पुगलमे प्रशंसा करलै ।

१४ औं वर्षके अवधीमे हिमशिखरसे गरिबी निवारणमे केल नइहुके सामाजिक क्षेत्रमे समेत उल्लेख्य भूमिका खेलल मन्त्री सोडारी बटैलै । सहकारीसे धनगढी उप–महानगरपालिका, गोदावरी, गौरीगंगा नगरपालिका ओ कैलारी गाउँपालिकासम शाखा विस्तार करके सेवा प्रदान करटी आइलमे उहाँ प्रशंसा करलै ।

उ शहकारीके शेयर पूँजी ३ करोड २९ लाख १३ हजार ५०० रहलमे कर्जा लगानी ५७ करोड २४ लाख ८१ हजार ६५४ ओ ४३ करोड ४९ लाख ९० हजार ११४ बचत तथा निक्षेप रहल बा ।

कार्यक्रममे सहकारी संस्थाके अध्यक्ष दुर्गाप्रसाद भण्डारी सञ्चालक समितिके ओरसे १४ औं वार्षिक साधारणसभामे प्रतिवेदन प्रस्तुत करल रहे कलेसे व्यवस्थापक प्रतिवेदन संस्थाके व्यवस्थापक महेन्द्र शाही प्रस्तुत करले रहिट । कार्यक्रमके सञ्चालन सहकारीके सचिव विमल जोशी करले रहिट कलेसे शुभकामना मन्तव्य उपाध्यक्ष रोशन सिंह करले रहिट ।

कार्यक्रममे टमान व्यक्ति सम्मानित

हिमशिखर बहुद्देश्यीय सहकारी संस्था लिमिटेडके १४ औं बार्षिक साधारणसभामे टमान व्यक्ति सम्मानित हुइल बटै ।
सहकारीके क्षेत्रमे नम्मा समयसे पत्रकारिता क्षेत्रमे कलम चलाइलवापत राष्ट्रिय समाचार समितिके समाचारदाता तथा पत्रकार महासंघके राष्ट्रिय परिषद सदस्य मीन ठकुरी पुरस्कृत हुइल बटै ।
उत्कृष्ट कर्मचारीके रुपमे धनगढी शाखामे कार्यरत लालबहादुर बोहरा, हिमशखिर सहकारी गीतके रचनाकार प्रेमबिवश चन्द पुरस्कृत हुइल बटै ।
ओस्टेक करके धनगढी १ मेनरोडके दीर्घराज जोशी, गौरीगंगा ८ के इन्द्रबहादुर कलेल ओ कैलारी ३ के भरतराम डगौराहे जेष्ठ सदस्य सम्मान करल बा ।
उत्कृष्ट बचत सदस्य सम्मानमे धनगढी ४ बसपार्कके प्रज्ञा केसी, गौरीगंगा ८ बढैपुरके जानकी महरा ओ कैलारी १ हसुलियाके मनकुमारी जेठाराहे प्रशंसापत्र वितरण करल बा ।
असल ऋणी सदस्य सम्मानमे धनगढी ३ बोराडाँडीके साबित्री बास्तोला, गोदावरी ५ गेटाके दिनेशबहादुर धामी, गौरीगंगा नगरपालिका ८ लिक्माके अनन्तराम डगौरा ओ कैलारी ७ रतनपुरके मौसम्पी चौधरीहे प्रशंसा पत्र वितरण करल बा ।