मौलिक पहिरनमे आइल सांसद सक्कुहुनके ध्यान टन्लै
पहुरा समाचारदाता
धनगढी, १५ पुस । सुदूरपश्चिम प्रदेशसभा निर्वाचनमे निर्वाचित प्रदेश सभा सदस्यहुकनके लाग शुकके रोज हुइल शपथ ग्रहण कार्यक्रममे अपने मौलिक परम्परागत पहिरनमे आइल सांसद सक्कुहुनके ध्यान टन्ले बटै ।
अधिकांश प्रदेश सभा सदस्य दौरा सुरुवाल, कोटसहित नेपाली टोपीमे सपरके अइलेसेफे नागरिक उन्मुक्ति पार्टीसे निर्वाचित प्रदेश सदस्य रामेश्वर चौधरी, लक्ष्मण किशोर चौधरी, कैलाश चौधरी, घनश्याम चौधरी, खुशीराम चौधरी अपने मौलिक पहिरन उज्जर धोती, गोरक पौलामे कठुवक पौवा, मुरीमे पौराणिक टोपी घल्ले रहिट । ओइने प्रदेश सभा परिसरमे पौला टेक्टीकी सक्कुहुनके ध्यान टन्लै ।
नेपाली कांग्रेसके समानुपातिक प्रदेश सभा सदस्य गीता कुमारी चौधरीके फोटु लेहुइयाके भिडफे कम नइरहे । सुग्गर मुहार ओम्नेफे अपने मौलिक परिहन लेहंगा, चोलिया, घोचामे ओ मुरीभर चाँदीक गरगहना सजल उहाँ परिसरमे ठरहयइटी पत्रकार ओ आगन्तुकहुकनके क्यामेराके निशाना बन्टी रहली ।
राप्रपासे प्रदेश सभा सदस्य रहल खेमा देवी बिष्ट फे अपने मौलिक पहिरनमे सजके शपथ ग्रहण लेली । घाँघ्रा ओ चोलीमे बहुट सुहाइल बिष्टफे सक्कुहुनके ध्यान तानल रहिट । घाँघ्रा ओ चोली डोटी, अछाम, बाजुरालगायतके मौलिक पोषाक हो ।
समाचारके अंश ओ फोटु ढकिया खबरसे
