कैलारीमे सिकलसेल मेसिन उदघाटन

पहुरा समाचारदाता
हसुलिया, १७ पुुस । कैलालीके कैलारी गाउँपालिका–८ उदासीपुर प्राथमिक स्वास्थ्य केन्द्रमे सिकलसेलके मेसिन उदघाटनके साथे सेवा सुचारु हुइल बा ।

सिकलसेल मेसिनके उदघाटन आज कैलारी गाउँपालिकाके अध्यक्ष राजसमझ चौधरीके एक कार्यक्रमके विच करल रहिट । उ मेसिनके उदघाटन करटी उहाँ कैलारीमे ९५ प्रतिशत थारु समुदायके बासोबास रहल ओ सिकलसेल रोग थारु समुदायमे ढेर डेखा परटी रहल ओरसे चेकजाँचमे सहजुल होए कहटी मेसिन नानके चेकजाँच सुरु करल बटैलै ।

सिकलसेल रोग लागल व्यक्तिहुकनहे ढेर रगत चाहल ओरसे यी पालिकाके जौनफे विमारी नेपाल रेडक्रस सोसाइटी धनगढीमार्फत निशुल्क रगतके व्यवस्था मिलाइलफे कार्यक्रमके वडका रहल गाउँपालिका अध्यक्ष बटैलै ।
कार्यक्रमके विशिष्ट पहुना सामाजिक विकास संयोजक तथा वडा नम्बर ३ के वडा अध्यक्ष सन्तराम चौधरी रहिट ।

वडा नम्बर ८ के वडा अध्यक्ष तारामल कठरियाके अध्यक्षतामे हुइल कार्यक्रममे स्वास्थ्य शाखा प्रमुख नरेश चौधरी, वडा सदस्य, कर्मचारीहुकनके सहभागिता रहे । ओस्टेक कुछ दिन आघे उदासीपुर प्राथमिक स्वास्थ्य केन्द्रमे भिडियो एक्सरे सेवा सुचारु हुइल रहे ।