थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

कैलारीमे उपाध्यक्षसंग पोषण विशेष कार्यक्रम सुरु

पहुरा | २९ पुष २०७९, शुक्रबार
कैलारीमे उपाध्यक्षसंग पोषण विशेष कार्यक्रम सुरु

पहुरा समाचारदाता
हसुलिया, २९ पुस ।
कैलालीके कैलारी गाउँपालिकामे सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सुरु हुइल बा ।

गाउँ पालिका अन्तर्गतके स्वास्थ्य संस्थामे सुत्केरी हुूइल महिलाहुकनके लाग उपाध्यक्षसंग पोषण विशेष कार्यक्रम अन्तर्गत शुकके रोज वडा न ५ ओ ७ के ५८ जाने सुत्केरी महिलाहुकन कोसेली (पोषण सामाग्री तथा हाइजिन किट) हस्तान्तर करके सुरुवाट कैगिल हो ।

गाउँपालिकाके उपाध्यक्ष भगवतीकुमारी चौधरीके वडका पहुनामे वडा नम्बर ७ से सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सुरु हुइल बा । कार्यक्रममे बोल्टी उहाँ कहली, पहिले यी कार्यक्रम लागु हुइल नइरहे, अब्बे हम्रे विजयी हुके आइलपाछे यी कार्यक्रम लागु कैल हो । सुत्केरी महिला हुइलपाछे ढेर चिजके समस्या आइठ । डाईसंग संगे बच्चाके स्वास्थ्य मजा होए कहिके यी कार्यक्रम लागु करल हो ।’

कार्यक्रमके विशिष्ट पहुना कैलारी गाउँपालिकाके प्रवक्ता दिपेन्द्रबहादुर बम पालिकामे लागु हुइल यी लौवा योजना रहल बटैलै । उहाँ कहलै, पालिकासे नानल सुत्केरी महिला हाइजिन किट, पोषण किट ओ बच्चा किट उपहार योजनासे डाई ओ लर्कनके स्वास्थ्यमे टेवा पुगी ।’ पालिकासे गर्भवती महिलाहुकनहे सुत्केरी हुई धनगढी जाई पर्ना अवस्था हुइलेसे निशुल्क एम्बेलेन्सके व्यवस्था करलफे प्रवक्ता बम बटैलै । पोषणयुक्त खाना नइपाके ढेर जैसिन बच्चा कुपोषण हुइटी रहल ओरसे यी कोसेलीसे उही पुर्ति कैनाफे सहयोग मिल्ना उहाँ बटैलै ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सक्कु वडामे लागु हुइना बटैलै । उहाँ कहलै, अब्बे २ ठो वडामे उ समान हस्तान्तरण कैगिल बा । माघ टिहुवारपाछे सक्कु वडामे उ समान हस्न्तारण कैजाई ।

सावन महिनासे अगनह महिनासम लर्का जन्माइल सक्कु लरकोरिया डाईहे उ समान डेटी रहल स्वास्थ्य शाखा प्रमुख बटैलै । ओस्टेक अगहनपाछे सुत्केरीहे चैतमे ओ चैतपाछेक सुत्केरीहे असार मसान्तमे उ समान डेना उहाँ बटैलै । उपाध्यक्षसंग पोषण विशेष कार्यक्रम अन्र्तगतके कोसेली झोलामे सुत्केरी डाईक लाग हाइजिन किटमे (व्याग, ब्रस टुथपेष्ट, नोह कटनी, साबुन, सेनेटरी प्याड), बच्चा किटमे बेबी सोप, बेबी स्याम्पु, क्रिम, तेल) ओ पोषण सामाग्रीमे पाँच सय ग्राम घिउ, अण्डा ३० पिस, काजु १०० ग्राम ओ बदाम १०० ग्राम रहल बा ।

कार्यक्रमके संचालन रतनपुर स्वास्थ्य चौकीके प्रमुख विनोद जोशी, उ चौकीके सन्ंिजव गुरुङ, नर्स रितु खरेल, गाउँपालिका उपाध्यक्षके स्वकीय सचिव कृष्ण चौधरी लगायतके उपस्थिति रहे । ओस्टेक कार्यक्रममे कैलारी–७ के वडा सदस्य तथा कार्यपालिका सदस्य सुन्दरीदेवी चौधरीफे उ सामाग्री हस्न्तारण करल रहिट ।

वडा नम्बर ७ मे सावन यहोर सुत्केरी हुइल ५० जनहनहे पोषण सामाग्री तथा हाइजिन किट हस्तान्तरण कैगिल बा । ओस्टेक वडा नम्बर ५ मे ८ जनहनहे पोषण सामाग्री तथा हाइजिन किट हस्तान्तरण कैगिल बा । वडा नम्बर ५ मे गाउँपालिका उपाध्यक्ष भगवतीकुमारी चौधरी, वडा सदस्य पार्वती परियार, अनारकली चौधरी पोषण सामाग्री तथा हाइजिन किट हस्तान्तरण रहिट । वडा नम्बर ५ मे पवेरा स्वास्थ्य केन्द्रके प्रमुख खगेन्द्र महरा लगायत कर्मचारीहुकनके सहभागिता रहे । कार्यक्रम संचालन कुसुम चौधरी करले रहिट ।

जनाअवजको टिप्पणीहरू